ટેનેરાઈફ (સ્પેન): એટલાન્ટિક મહાસાગરમાં મુસાફરી કરી રહેલા ડચ ધ્વજ ધરાવતા ક્રુઝ શિપ 'એમવી હોન્ડિયસ'માં હેન્ટાવાયરસનો કહેર જોવા મળ્યો છે. આ જહાજ રવિવારે સ્પેનના કેનેરી આઈલેન્ડ્સ પર આવેલા ગ્રેનાડિલા બંદર પર પહોંચ્યું હતું. જહાજ પર સવાર મુસાફરોમાં આ દુર્લભ વાયરસ ફેલાતા અત્યાર સુધીમાં ત્રણ લોકોના મોત નિપજ્યા છે, જેમાં નેધરલેન્ડના એક પતિ-પત્ની અને એક જર્મન મહિલાનો સમાવેશ થાય છે. આ ઘટનાને પગલે આંતરરાષ્ટ્રીય સ્તરે ચિંતા વ્યાપી ગઈ છે.

વિશ્વ આરોગ્ય સંસ્થા (WHO) એ આ વાયરસના છ કેસની પુષ્ટિ કરી છે, જ્યારે અન્ય બે શંકાસ્પદ કેસ નોંધાયા છે. સ્પેનના આરોગ્ય મંત્રી મોનિકા ગાર્સિયાએ જણાવ્યું હતું કે, જહાજ પરથી મુસાફરોને સુરક્ષિત રીતે બહાર કાઢવાની પ્રક્રિયા શરૂ કરી દેવામાં આવી છે. સૌથી પહેલા સ્પેનિશ નાગરિકોને નાની બોટ દ્વારા કિનારે લાવવામાં આવશે અને ત્યાંથી તેમને વિમાન મારફતે તેમના ગંતવ્ય સ્થાને મોકલવામાં આવશે. આ સમગ્ર પ્રક્રિયા દરમિયાન સ્થાનિક વસ્તી સાથે કોઈ સંપર્ક ન થાય તેની કડક તકેદારી રાખવામાં આવી રહી છે.

હેન્ટાવાયરસ સામાન્ય રીતે ઉંદર જેવા પ્રાણીઓ દ્વારા ફેલાતો હોય છે અને તે જીવલેણ બની શકે છે. જોકે, WHO ના પ્રમુખ ટેડ્રોસ અધાનમ ઘેબ્રેયેસસે સ્પષ્ટતા કરી છે કે આ કોવિડ જેવી મહામારી નથી અને તેને કાબૂમાં લેવા માટે તમામ પ્રયાસો કરવામાં આવી રહ્યા છે. જહાજ પર સવાર બ્રિટિશ ડોક્ટર સહિત કેટલાક ક્રૂ મેમ્બરો પણ બીમાર પડ્યા છે, જેમને અગાઉ હોસ્પિટલ એરક્રાફ્ટ દ્વારા સારવાર માટે ખસેડવામાં આવ્યા હતા.

ગ્રેનાડિલા બંદરની આસપાસ સુરક્ષા ઘેરો મજબૂત કરવામાં આવ્યો છે અને સમુદ્રી પ્રતિબંધિત વિસ્તાર જાહેર કરાયો છે. મુસાફરોને બહાર કાઢ્યા બાદ આ જહાજ નેધરલેન્ડના રોટરડેમ ખાતે જશે, જ્યાં તેને સંપૂર્ણપણે ડિસઇન્ફેક્ટ (નિર્જંતુકૃત) કરવામાં આવશે. સત્તાવાળાઓએ ખાતરી આપી છે કે પરિસ્થિતિ પર ચાંપતી નજર રાખવામાં આવી રહી છે અને ચેપ આગળ વધતો અટકાવવા માટે તમામ પ્રોટોકોલનું પાલન કરવામાં આવી રહ્યું છે.