તા. ૨૧ ઓગષ્ટ ર૦ર૬ વિક્રમ સંવત ર૦૮૨ શ્રાવણ સુદ – ૯ શુક્રવાર
News of Wednesday, 18th November 2026
બિહારના બેતિયામાં સેન્કો ગોલ્ડ શોરૂમમાં ₹30 કરોડથી વધુના દાગીનાની સશસ્ત્ર લૂંટ
8-9 હથિયારધારી શખ્સોએ કર્મચારીઓને બંધક બનાવી લૂંટ ચલાવી : શોરૂમમાં ફરજ બજાવતા સુરક્ષા ગાર્ડને પણ ગંભીર ઈજા પહોંચી

બિહારના બેતિયામાં ધોળા દિવસે કરોડો રૂપિયાની લૂંટની સનસનાટીભરી ઘટના સામે આવી છે. શહેરના સૌથી વ્યસ્ત વિસ્તારોમાંના એક સુપ્રિયા સિનેમા રોડ પર આવેલા સેન્કો ગોલ્ડ એન્ડ ડાયમંડ શોરૂમને સશસ્ત્ર લૂંટારુઓએ નિશાન બનાવ્યો હતો. બુધવારે બપોરના સમયે આશરે 8થી 9 હથિયારધારી શખ્સો શોરૂમમાં ઘૂસી આવ્યા હતા અને કર્મચારીઓને બંધક બનાવીને લૂંટ ચલાવી હતી. પ્રાથમિક અંદાજ મુજબ, આ લૂંટમાં ₹30 કરોડથી વધુની કિંમતના સોના, ચાંદી અને હીરાના દાગીના ચોરાયા હોવાની આશંકા છે.
મળતી માહિતી મુજબ, શોરૂમમાં પ્રવેશતાની સાથે જ લૂંટારુઓએ કર્મચારીઓને હથિયારો બતાવીને ડરાવ્યા હતા અને તમામને એક જગ્યાએ બંધક બનાવી દીધા હતા. આ દરમિયાન કેટલાક કર્મચારીઓએ વિરોધ કરવાનો પ્રયાસ કરતાં તેમની સાથે મારપીટ કરવામાં આવી હતી. શોરૂમમાં ફરજ બજાવતા સુરક્ષા ગાર્ડને પણ ગંભીર ઈજા પહોંચી હતી. લૂંટારુઓએ પિસ્તોલના બટથી તેના માથા પર હુમલો કર્યો હોવાનું સામે આવ્યું છે.
લૂંટારુઓએ શોરૂમના બંને માળમાં રાખેલા સોના, ચાંદી અને હીરાના દાગીના એકત્રિત કર્યા હતા. ત્યારબાદ હથિયારોના જોરે કર્મચારીઓને ડરાવીને ઘટનાસ્થળેથી ફરાર થઈ ગયા હતા. સમગ્ર ઘટનાક્રમ શોરૂમમાં લગાવવામાં આવેલા CCTV કેમેરામાં કેદ થયો છે. ફૂટેજમાં લૂંટારુઓ હથિયારો સાથે શોરૂમમાં પ્રવેશતા અને કર્મચારીઓને કાબૂમાં લેતા જોવા મળ્યા હોવાનું જાણવા મળ્યું છે.
ઘટનાની જાણ થતાં જ સ્થાનિક પોલીસ સહિત જિલ્લાના ઉચ્ચ અધિકારીઓ તાત્કાલિક ઘટનાસ્થળે દોડી આવ્યા હતા. ડીઆઈજી, એસપી, ડીએસપી સહિતના અધિકારીઓએ શોરૂમની મુલાકાત લઈને તપાસ શરૂ કરી હતી. પોલીસે CCTV ફૂટેજ કબજે કરીને લૂંટારુઓની ઓળખ કરવા માટે તપાસ હાથ ધરી છે. આરોપીઓની સંખ્યા 8થી 9 હોવાની પ્રાથમિક માહિતી સામે આવી છે.
(10:43 PM IST)









છેલ્લા 8 દિવસમાં સૌથી લોકપ્રિય 
