મુંબઈ: મહારાષ્ટ્રના જાણીતા તર્કવાદી અને અંધશ્રદ્ધા નિર્મૂલન સમિતિના સ્થાપક નરેન્દ્ર દાભોલકરની હત્યાના કેસમાં એક મોટો વળાંક આવ્યો છે. મુંબઈ હાઈકોર્ટે આજે આ કેસના મુખ્ય દોષિતો પૈકીના એક શરદ કલસ્કરને જામીન મંજૂર કર્યા છે. જસ્ટિસ અજય ગડકરી અને જસ્ટિસ આર.આર. ભોસલેની ખંડપીઠે કલસ્કર દ્વારા સજા સામે કરવામાં આવેલી અપીલની સુનાવણી પડતર હોવાથી આ રાહત આપી છે.
ઉલ્લેખનીય છે કે, 20 ઓગસ્ટ 2013ના રોજ પુણેમાં જ્યારે 67 વર્ષીય નરેન્દ્ર દાભોલકર સવારના સમયે મોર્નિંગ વોક પર નીકળ્યા હતા, ત્યારે મોટરસાઇકલ પર આવેલા હુમલાખોરોએ તેમની ગોળી મારીને હત્યા કરી દીધી હતી. આ કેસની તપાસ બાદ 10 મે, 2024ના રોજ સેસન્સ કોર્ટે સચિન અંદુરે અને શરદ કલસ્કરને હત્યાના દોષિત ઠેરવી આજીવન કેદની સજા ફટકારી હતી. જોકે, કલસ્કરે આ ચુકાદાને હાઈકોર્ટમાં પડકાર્યો હતો અને વચગાળાના જામીન માંગ્યા હતા.
આ કેસની તપાસ શરૂઆતમાં પુણે પોલીસે કરી હતી અને ત્યારબાદ સીબીઆઈ (CBI) ને સોંપવામાં આવી હતી. દાભોલકરની હત્યા બાદ ગોવિંદ પાનસરે, એમ.એમ. કલબુર્ગી અને ગૌરી લંકેશ જેવા વિચારકોની પણ સમાન રીતે હત્યા કરવામાં આવી હતી, જેને લઈને દેશભરમાં ભારે આક્રોશ ફેલાયો હતો. શરદ કલસ્કરને ઓક્ટોબર 2025માં કોમ્યુનિસ્ટ નેતા ગોવિંદ પાનસરેની હત્યાના કેસમાં પણ હાઈકોર્ટની કોલ્હાપુર બેન્ચ દ્વારા જામીન આપવામાં આવ્યા હતા.
બીજી તરફ, નરેન્દ્ર દાભોલકરની પુત્રી મુક્તા દાભોલકરે પણ હાઈકોર્ટમાં અપીલ દાખલ કરી છે. તેમની માંગ છે કે આ કેસમાં અન્ય નિર્દોષ છૂટેલા આરોપીઓને પણ સજા થવી જોઈએ અને આ માત્ર એક હત્યા નથી પણ એક મોટું ષડયંત્ર છે. હાઈકોર્ટના આજના જામીનના નિર્ણયની વિગતવાર નકલ ટૂંક સમયમાં ઉપલબ્ધ થશે, પરંતુ આ આદેશે ફરી એકવાર આ હાઈ-પ્રોફાઈલ મર્ડર મિસ્ટ્રીને ચર્ચામાં લાવી દીધી છે.