નવી દિલ્હી : લદ્દાખને બંધારણની છઠ્ઠી અનુસૂચિમાં સામેલ કરવા અને રાજ્યનો દરજ્જો આપવાની માંગ સાથે દિલ્હીના જંતર-મંતર પર ચાલી રહેલું સોનમ વાંગચુકનું આંદોલન હવે અત્યંત નાજુક વળાંક પર પહોંચી ગયું છે. સતત ૨૦ દિવસથી કડક ભૂખ હડતાળ પર બેઠેલા જાણીતા પર્યાવરણવિદ વાંગચુકની તબિયત લથડતાં શનિવારે સવારે દિલ્હી પોલીસે તેમને તાત્કાલિક સફદરજંગ હોસ્પિટલમાં ખસેડ્યા હતા. આ ઘટનાને પગલે દેશભરમાં ચાહકો અને સમર્થકોમાં ભારે રોષ ફાટી નીકળ્યો છે, અને દેશના વરિષ્ઠ સામાજિક કાર્યકર્તા અન્ના હજારે પણ હવે વાંગચુકના સમર્થનમાં સત્તાવાર રીતે મેદાને આવ્યા છે.

અન્ના હજારેએ કેન્દ્ર સરકારના વલણ સામે આકરા પ્રહારો કરતા સ્પષ્ટ શબ્દોમાં ચેતવણી આપી છે કે સરકારે સોનમ વાંગચુક જેવા દેશભક્ત વ્યક્તિની ધીરજની વધુ કસોટી ન કરવી જોઈએ. તેમણે દિલ્હી સત્તાવાળાઓને અપીલ કરી છે કે આટલા દિવસોથી દેશના એક મહત્વપૂર્ણ ક્ષેત્ર માટે લાંબી લડત લડી રહેલા આંદોલનકારીઓ સામે સરકારે પોતાનું લાંબુ મૌન તોડવું જ પડશે. અન્નાએ ઉમેર્યું કે, સરકાર તેમની તમામ માંગણીઓ સ્વીકારે કે ન સ્વીકારે, પરંતુ લોકશાહીમાં વાતચીતના દરવાજા બંધ રાખવા એ સંપૂર્ણપણે અયોગ્ય અને નકારાત્મક દ્રષ્ટિકોણ છે.

બીજી તરફ, સફદરજંગ હોસ્પિટલના મેડિકલ બુલેટિન અનુસાર, ૨૦ દિવસ સુધી ઘન ખોરાક ન લેવાના કારણે સોનમ વાંગચુકના શરીરમાં ભારે નબળાઈ આવી ગઈ છે અને ડિહાઇડ્રેશનના ગંભીર લક્ષણો જોવા મળ્યા છે. જો કે, રાહતની વાત એ છે કે હોસ્પિટલમાં દાખલ કરતી વખતે તેઓ સંપૂર્ણ ભાનમાં હતા અને તેમનું બ્લડ પ્રેશર, પલ્સ તેમજ ઓક્સિજન લેવલ નિયંત્રણમાં હતું. હાલમાં ડોક્ટરોની એક વિશેષ ટીમ તેમના સ્વાસ્થ્ય પર સતત નજર રાખી રહી છે અને તેમને ગ્લુકોઝ તેમજ સારવાર લેવા માટે મનાવવાના સઘન પ્રયાસો કરી રહી છે, પરંતુ વાંગચુક હજુ પણ પોતાની મક્કમ મનોવૃત્તિ સાથે લદ્દાખના હિત માટે મક્કમ દેખાઈ રહ્યા છે.