મનાલી, : ભારતના મેદાની રાજ્યોમાં પડી રહેલી ભીષણ ગરમીથી રાહત મેળવવા લાખો પ્રવાસીઓએ હિમાચલ પ્રદેશ અને ઉત્તરાખંડના હિલ સ્ટેશનો તરફ દોટ મૂકતા સ્થાનિક વહીવટી તંત્ર માટે ટ્રાફિક મેનેજમેન્ટ મોટી માથાનો દુખાવો બન્યું છે, જ્યારે બીજી તરફ આ પ્રવાહને કારણે પહાડી વિસ્તારોની આર્થિક ગતિવિધિઓને મોટો વેગ મળ્યો છે.
કુલ્લુ-મનાલી હાઇવે પર વાહનોની લાંબી કતારો અને મહાજામ હિમાચલ પ્રદેશમાં પર્યટન સીઝન હાલ તેના સર્વોચ્ચ શિખરે છે. વીકેન્ડ દરમિયાન હજારો પ્રવાસીઓ પોતાના ખાનગી વાહનો લઈને કુલ્લુ-મનાલી તરફ રવાના થતાં ચંદીગઢ-મનાલી રાષ્ટ્રીય રાજમાર્ગ પર કિલોમીટરો લાંબો ટ્રાફિક જામ જોવા મળ્યો હતો. પંડોહના 7 મીલ વિસ્તારથી લઈને ઓટ સુધી વાહનોની લાંબી કતારો લાગી હતી અને પ્રવાસીઓ કલાકો સુધી જામમાં ફસાયેલા રહ્યા હતા. મંડી પોલીસના જણાવ્યા અનુસાર, પંડોહથી ઓટ સુધી ફોરલેન હાઇવેનું કામ હજુ અધૂરું છે અને પાછલા વર્ષોમાં આવેલી કુદરતી આપદાને કારણે રસ્તાઓ ક્ષતિગ્રસ્ત હોવાથી વાહનોને જૂના હાઇવે પર ડાયવર્ટ કરવા પડ્યા છે. ટ્રાફિકને કંટ્રોલ કરવા માટે હાઇવે પર 40 વધારાના પોલીસ જવાનો તૈનાત કરાયા છે. ગયા વીકેન્ડમાં આ માર્ગ પરથી 17 હજાર વાહનો મનાલી પહોંચ્યા હતા.
મનાલીમાં 13 દિવસમાં 3 લાખ પ્રવાસીઓનો નવો રેકોર્ડ પર્યટન નગરી મનાલીમાં પ્રવાસીઓનો અભૂતપૂર્વ સૈલાબ ઉમટ્યો છે. સત્તાવાર આંકડા મુજબ, વિતેલા માત્ર 13 દિવસની અંદર આશરે 3 લાખ પ્રવાસીઓ કુલ્લુ-મનાલી પહોંચ્યા છે. અટલ ટનલ રોહતાંગ, રોહતાંગ પાસ, શિંકુલા અને બારાલાચા જેવા બરફ આચ્છાદિત પ્રદેશો જોવા લોકો ક્રેઝી બન્યા છે. પાછલા 5 દિવસમાં અટલ ટનલથી 50 હજારથી વધુ વાહનો પસાર થયા છે, જ્યારે માત્ર મનાલી શહેરમાં જ 15 હજારથી વધુ બહારના રાજ્યોના વાહનોની એન્ટ્રી નોંધાઈ છે. સ્થાનીય હોટેલો અને હોમસ્ટેમાં ઓક્યુપન્સી 90% એ પહોંચી ગઈ છે. જો કે, ટ્રાફિકના કારણે પ્રવાસીઓને 1 કિલોમીટરનું અંતર કાપવામાં 1 કલાક જેટલો સમય વેડફવો પડી રહ્યો છે, જેની અસર સ્થાનીય સ્કૂલી બાળકો અને ઓફિસ જતા લોકો પર પણ થઈ છે.
ગત વર્ષે ચોમાસા દરમિયાન હિમાચલ પ્રદેશમાં ભારે પૂર અને ભૂસ્ખલનને કારણે પ્રવાસન ઉદ્યોગને મોટું નુકસાન થયું હતું અને રસ્તાઓ ધોવાઈ ગયા હતા. વર્તમાન પરિસ્થિતિને જોતા હવે પર્યટન વિભાગ અને સ્થાનિક પોલીસ આગામી દિવસોમાં ટ્રાફિક નિયંત્રણ માટે વન-વે સિસ્ટમ અને સેટેલાઈટ પાર્કિંગ જેવા નવા કડક પગલાં લાગુ કરવા જઈ રહી છે જેથી સ્થાનિક નાગરિકોને મુશ્કેલી ન પડે.