નવી દિલ્હી, તા.૦૮: ઉત્તરાખંડના પર્વતોથી શરૂ થયેલી એક અસાધારણ સફર આજે દેશના લાખો યુવાનો અને મહિલાઓ માટે પ્રેરણાનો સ્ત્રોત બની ગઈ છે. BAMS ડૉક્ટર તરીકે કારકિર્દીની શરૂઆત કરનાર અલ્મોડાની દીકરી શ્રદ્ધા જોશીએ સિવિલ સર્વિસ પ્રત્યેના પોતાના સમર્પણ અને મહેનતના બળે દેશની સર્વોચ્ચ વહીવટી સેવાઓમાં સ્થાન મેળવ્યું છે. પ્રસિદ્ધ IPS અધિકારી મનોજ કુમાર શર્માના પત્ની શ્રદ્ધા જોશીએ પતિના કઠિન સંઘર્ષમાં મજબૂત ઢાલ બનીને સાથ આપવાની સાથે સાથે પોતાની ક્ષમતાથી UPSC પરીક્ષા ઉત્તીર્ણ કરી IRS અધિકારી બનવાની સિદ્ધિ હાસલ કરી છે.

૫ માર્ચ, ૧૯૭૯ના રોજ ઉત્તરાખંડના અલ્મોડા જિલ્લામાં જન્મેલી શ્રદ્ધા જોશી બાળપણથી જ અભ્યાસમાં અત્યંત તેજસ્વી હતી અને ૧૨મા ધોરણમાં રાજ્ય બોર્ડમાં ૧૩મો રેન્ક મેળવ્યો હતો. તબીબ માતા-પિતાનું સ્વપ્ન પૂરું કરવા માટે તેણીએ હરિદ્વારના ગુરુકુળ કાંગરીમાંથી આયુર્વેદિક મેડિસિન અને સર્જરી (BAMS)ની ડિગ્રી મેળવી ડૉક્ટર તરીકે સેવાઓ આપવાનું શરૂ કર્યું હતું. જોકે, હોસ્પિટલમાં ફરજ દરમિયાન જ તેમને ભાન થયું કે તેમનું સાચું લક્ષ્ય દેશની સિવિલ સર્વિસ મારફતે સમાજસેવા કરવાનું છે.

પોતાના સ્વપ્નને સાકાર કરવા શ્રદ્ધા દિલ્હીના મુખર્જી નગર આવ્યા, જ્યાં તેમની મુલાકાત મનોજ કુમાર શર્મા સાથે થઈ હતી. ૧૨મા ધોરણમાં નાપાસ થવા છતાં મનોજ શર્માના અદમ્ય આત્મવિશ્વાસ અને સંઘર્ષથી પ્રભાવિત થઈને શ્રદ્ધા તેમના કઠિન સમયમાં સતત તેમની સાથે ખડકની જેમ અડીખમ ઊભા રહ્યા હતા. મનોજ શર્મા સતત ત્રણ વખત UPSC પરીક્ષામાં અસફળ રહ્યા છતાં, શ્રદ્ધાએ તેમનો ઉત્સાહ ક્યારેય તૂટવા દીધો નહોતો અને પોતાના અભ્યાસની સાથે પતિને પણ સતત પ્રોત્સાહિત કર્યા હતા.

શ્રદ્ધા જોશીએ વર્ષ ૨૦૦૫માં રાજ્ય નાગરિક સેવા (PCS) પરીક્ષા પાસ કરીને ઉત્તરાખંડમાં ડેપ્યુટી કલેક્ટર તરીકે સફળતાપૂર્વક જવાબદારી સંભાળી હતી. પરંતુ તેમનું લક્ષ્ય મોટું હોવાથી તેમણે ૨૦૦૭માં ફરીથી UPSCની પરીક્ષા આપી અને સમગ્ર દેશમાં ૧૨૧મો ક્રમ (AIR 121) પ્રાપ્ત કરીને ભારતીય મહેસૂલ સેવા (IRS) કેડર મેળવી હતી. ત્યારબાદ તેમણે મહારાષ્ટ્ર સરકારના MAVIM અને MTDC જેવી સંસ્થાઓમાં મેનેજિંગ ડિરેક્ટર (MD) તરીકે વરિષ્ઠ હોદ્દાઓ પર સેવા આપી પોતાની કુશળતા સાબિત કરી હતી.

પોતાના લગ્નજીવનના રસપ્રદ કિસ્સાઓ શેર કરતા શ્રદ્ધા જોશીએ એક મુલાકાતમાં જણાવ્યું હતું કે, પહાડી સંસ્કૃતિ અને ચંબલના વાતાવરણ વચ્ચે ઘણો તફાવત હોવા છતાં બંને પરિવાર એક થયા હતા. પહાડી વિસ્તારના શાંત વાતાવરણમાંથી આવતી શ્રદ્ધાના લગ્નમાં ચંબલની પરંપરા મુજબ ઉત્સાહમાં હવામાં ફાયરિંગ થવાના બનાવો બન્યા હતા. આ તમામ વિપરીત પરિસ્થિતિઓ અને સાંસ્કૃતિક ભિન્નતાઓ વચ્ચે પણ આ દંપતીએ એકબીજાના સપનાઓને પૂર્ણ કરવામાં અભૂતપૂર્વ સહયોગ આપ્યો છે.

હાલમાં શ્રદ્ધા જોશી મુંબઈ ખાતે કસ્ટમ્સ વિભાગમાં કસ્ટમ્સ કમિશનર (ઓડિટ કમિશનરેટ) તરીકે ફરજ બજાવી રહ્યા છે અને સાથે જ પ્રિન્સિપલ કમિશનરનો વધારાનો હવાલો પણ સંભાળી રહ્યા છે. ડૉક્ટરથી લઈને રાજ્ય સેવા અને ત્યારબાદ કેન્દ્રીય સેવામાં ઉચ્ચ હોદ્દા સુધી પહોંચવાની તેમની આ પ્રેરણાદાયી સફર સાબિત કરે છે કે સખત પરિશ્રમ અને સ્પષ્ટ લક્ષ્ય હોય તો કોઈપણ વિષમ પરિસ્થિતિમાં પણ સફળતાના શિખરો સર કરી શકાય છે.