નવી દિલ્હી : આકાશમાં મુસાફરી કરી રહેલા મુસાફરો માટે એક મોટા સમાચાર સામે આવ્યા છે, જ્યાં રાષ્ટ્રીય રાજધાની દિલ્હીથી નેપાળ જઈ રહેલી એર ઈન્ડિયાની ફ્લાઈટમાં અચાનક ટેક્નિકલ ખરાબી સર્જાઈ હતી. પ્રાપ્ત માહિતી અનુસાર, દિલ્હીના ઈન્દિરા ગાંધી આંતરરાષ્ટ્રીય એરપોર્ટ પરથી કાઠમંડુ જવા માટે રવાના થયેલી એર ઈન્ડિયા ફ્લાઈટ AI219 ને ઉડાન દરમિયાન ટેક્નિકલ ખરાબીના કારણે અધવચ્ચેથી જ પાછી દિલ્હી તરફ વાળી લેવામાં આવી હતી.

જ્યારે આ વિમાન હવામાં હતું, ત્યારે પાયલટને વિમાનની સિસ્ટમમાં કોઈ ટેક્નિકલ ખરાબી હોવાનો અંદાજ આવ્યો હતો. મુસાફરોની સુરક્ષાને સર્વોપરી રાખીને એરલાઈનના પાયલટે સ્ટાન્ડર્ડ ઓપરેટિંગ પ્રોસિજર હેઠળ તાત્કાલિક દિલ્હી એરપોર્ટ પર જ વિમાનને સુરક્ષિત રીતે લેન્ડ કરાવવાનો નિર્ણય લીધો હતો. વિમાનનું સુરક્ષિત લેન્ડિંગ થતાં જ એરપોર્ટ ઓથોરિટી અને સંબંધિત અધિકારીઓએ રાહતનો શ્વાસ લીધો હતો.

વિમાન સુરક્ષિત રીતે લેન્ડ થયા બાદ તમામ મુસાફરોને હેમખેમ નીચે ઉતારી લેવામાં આવ્યા હતા. એર ઈન્ડિયાની ગ્રાઉન્ડ ટીમ દ્વારા મુસાફરોને પડતી અસુવિધાને દૂર કરવા માટે તાત્કાલિક ધોરણે વૈકલ્પિક વિમાનની વ્યવસ્થા કરવામાં આવી હતી, જેથી મુસાફરો પોતાની મંઝિલ તરફ સુરક્ષિત રીતે રવાના થઈ શકે. આ ઘટનાને લઈને એરલાઈન દ્વારા મુસાફરોને થયેલી અસુવિધા માટે ખેદ વ્યક્ત કરવામાં આવ્યો છે અને એન્જિનિયરિંગ ટીમ દ્વારા વિમાનની તપાસ શરૂ કરી દેવામાં આવી છે.

આ ઘટના બાદ એરલાઈન્સની સુરક્ષા વ્યવસ્થા અને પ્રી-ફ્લાઇટ ચેકિંગના ધોરણો પર સવાલો ઉઠ્યા છે, અને હવે એન્જિનિયરિંગ ટીમ દ્વારા વિમાનમાં સર્જાયેલી ખરાબીના મૂળ કારણની ઊંડાણપૂર્વક તપાસ હાથ ધરવામાં આવી રહી છે જેથી ભવિષ્યમાં આવી અસુવિધા નિવારી શકાય.