બર્ધમાન:પશ્ચિમ બંગાળ વિધાનસભા ચૂંટણી ૨૦૨૬ના પ્રચારમાં હવે કેન્દ્રીય નેતાઓની એન્ટ્રીથી માહોલ ગરમાયો છે. મંગળવારે બર્ધમાન જિલ્લામાં એક વિશાળ જનસભાને સંબોધતા કેન્દ્રીય ગૃહમંત્રી અમિતભાઈ શાહે મુખ્યમંત્રી મમતા બેનર્જીની સરકાર પર સીધા અને આકરા પ્રહારો કર્યા હતા. શાહે બંગાળમાં પ્રચલિત 'સિન્ડિકેટ' સંસ્કૃતિ અને ઘૂસણખોરીના મુદ્દે મમતા સરકારને ઘેરતા આગામી ચૂંટણીને બંગાળના પરિવર્તનની લડાઈ ગણાવી હતી.
સિન્ડિકેટ રાજનો અંત લાવવાની ચેતવણી
અમિતભાઈ શાહે પોતાના ભાષણમાં 'સિન્ડિકેટ' ને બંગાળના વિકાસમાં સૌથી મોટો અવરોધ ગણાવ્યો હતો.
તેમણે કહ્યું કે, "આજે બંગાળમાં સિમેન્ટ, ઈંટો કે રેતી ખરીદવા માટે પણ તમારે સિન્ડિકેટને પૈસા ચૂકવવા પડે છે. જો ભાજપ સત્તામાં આવશે, તો અમે આખી સિન્ડિકેટ ગેંગને બંગાળના અખાતમાં ફેંકી દઈશું."
શાહે આક્ષેપ કર્યો કે મમતા દીદીના શાસનમાં સામાન્ય માણસ લૂંટાઈ રહ્યો છે અને સિન્ડિકેટ સભ્યો ફૂલીફાલી રહ્યા છે.
ઘૂસણખોરી અને UCC પર મોટું નિવેદન: ગૃહમંત્રીએ ઘૂસણખોરીના મુદ્દે હિન્દુત્વ અને રાષ્ટ્રવાદના કાર્ડનો ઉપયોગ કરતા મમતા બેનર્જી પર તીખા બાણ છોડ્યા હતા.
 શાહે સ્પષ્ટ શબ્દોમાં કહ્યું કે, "આ ચૂંટણી કોઈ ભાજપ નેતાને મુખ્યમંત્રી બનાવવા માટે નથી, પરંતુ બંગાળને ઘૂસણખોરોથી મુક્ત કરવા માટે છે. અમે દરેક ઘૂસણખોરને પસંદગીપૂર્વક બહાર કાઢીશું."
2. સમાન નાગરિક સંહિતા (UCC): તેમણે વધુ એક મોટું વચન આપતા કહ્યું કે ભાજપ સત્તામાં આવશે તો બંગાળમાં સમાન નાગરિક સંહિતા લાગુ કરશે. તેમણે કટાક્ષ કરતા ઉમેર્યું કે UCC લાગુ થયા બાદ અહીં કોઈ ચાર વખત લગ્ન કરી શકશે નહીં.
રાજ્યના સરકારી કર્મચારીઓને આકર્ષવા માટે અમિતભાઈ શાહે આર્થિક મુદ્દાઓ પર પણ ભાર મૂક્યો હતો.
 તેમણે ખાતરી આપી હતી કે ભાજપની સરકાર બનતાની સાથે જ તમામ સરકારી કર્મચારીઓને ૭મા પગાર પંચ અને મોંઘવારી ભથ્થા (DA) નો બાકી રહેલો તમામ લાભ સુનિશ્ચિત કરવામાં આવશે.
પશ્ચિમ બંગાળમાં ૨૩ અને ૨૯ એપ્રિલના રોજ બે તબક્કામાં મતદાન થવાનું છે. અમિતભાઈ શાહે જનતાને આહવાન કર્યું હતું કે ૨૩ મેના રોજ કમળનું બટન દબાવીને ૫ મેના રોજ ભાજપની મજબૂત સરકાર બનાવવામાં મદદ કરે. મતગણતરી ૪ મેના રોજ થશે, જે નક્કી કરશે કે બંગાળમાં મમતા દીદીનો ગઢ અકબંધ રહે છે કે પછી અમિતભાઈ શાહની આ ગર્જના સત્તા પરિવર્તન લાવે છે.