​નવી દિલ્હી : ​દેશના અનેક રાજ્યોમાં પ્રચંડ ગરમી અને અસહ્ય ઉકળાટનો સામનો કરી રહેલા નાગરિકો માટે રાહતના સમાચાર સામે આવ્યા છે. ભારતીય હવામાન વિભાગ (IMD) દ્વારા દેશભરમાં ચોમાસાની આગળ વધતી ગતિને ધ્યાનમાં રાખીને ફરી એકવાર ભારે વરસાદ અને ધૂળની ડમરીઓ સાથે આંદી-તોફાનની કડક ચેતવણી જાહેર કરવામાં આવી છે. હવામાન પ્રવાહમાં આવેલા મોટા ફેરફારોને કારણે આગામી ૨૧ જૂનના રોજ દેશના મોટાભાગના વિસ્તારોમાં હવામાન પલટો જોવા મળશે.

​હવામાન વિભાગના સત્તાવાર અહેવાલ મુજબ, ૨૧ જૂનના રોજ રાષ્ટ્રીય પાટનગર દિલ્હી, ઉત્તર પ્રદેશ અને બિહાર સહિત દેશના અંદાજે ૨૩ રાજ્યોમાં ગાજવીજ સાથે મધ્યમથી ભારે વરસાદ પડવાની સંભાવના છે. આ ઉપરાંત પ્રાદેશિક વિસ્તારોમાં કલાકના ૪૦ થી ૬૦ કિલોમીટરની ઝડપે તેજ પવન અને વાવાઝોડું ફૂંકાવાની પણ આશંકા સેવાઈ રહી છે, જેને પગલે વહીવટી તંત્રને સાબદું કરી દેવામાં આવ્યું છે.

​રાજસ્થાન તેમજ ઉત્તર-પૂર્વના રાજ્યોમાં પણ આ પ્રતિકૂળ હવામાનની વ્યાપક અસર જોવા મળશે. પૂર્વ ભારતથી લઈને ઉત્તર-પશ્ચિમ ભારતના મેદાની વિસ્તારોમાં પ્રિ-મોન્સૂન એક્ટિવિટી અને ચોમાસાના આગમનને કારણે તાપમાનમાં મોટો ઘટાડો નોંધાશે, જેનાથી લોકોને ગરમીથી મોટી રાહત મળશે. હવામાન નિષ્ણાતોના મતે, આ ૨૩ રાજ્યોમાં કેટલાક સ્થળોએ અતિભારે વરસાદને કારણે નીચાણવાળા વિસ્તારોમાં પાણી ભરાવાની તેમજ વીજળી પડવાની ઘટનાઓ સામે સાવચેતી રાખવા માટે ખાસ એડવાઇઝરી પણ જારી કરવામાં આવી છે.