હાપુડ : સ્માર્ટ મીટરના વધતા વિરોધ અને જનતાના આક્રોશ સામે આખરે તંત્રએ નમતું જોખ્યું છે. રાજ્ય સરકારના નવા નિર્ણય મુજબ, ખાસ કરીને શ્રમિક અને મધ્યમ વર્ગના પરિવારો કે જેઓ ૧ કિલોવોટ સુધીનું ઘરેલું કનેક્શન ધરાવે છે, તેમને હવે સ્માર્ટ મીટરમાં બેલેન્સ શૂન્ય કે નેગેટિવ થઈ જવા છતાં તાત્કાલિક અંધારાનો સામનો નહીં કરવો પડે. એક મહિનાનું સાયકલ પૂર્ણ ન થાય ત્યાં સુધી વીજ જોડાણ કાપવા પર સંપૂર્ણ પ્રતિબંધ લાદી દેવામાં આવ્યો છે.

છેલ્લા કેટલાક સમયથી સ્માર્ટ મીટર સામે મહિલાઓ અને સ્થાનિકોમાં ઉગ્ર રોષ જોવા મળી રહ્યો હતો. હાપુડના રામગઢી સહિતના વિસ્તારોમાં રોષે ભરાયેલી મહિલાઓએ લાકડીઓ વડે મીટર તોડવાનો પ્રયાસ કરી ઉર્જા નિગમ સામે મોરચો માંડ્યો હતો. લોકોની આ નારાજગીને ધ્યાને રાખીને ઉર્જા મંત્રી એકે શર્માએ અધિકારીઓને કડક સૂચના આપી છે કે ગ્રાહકોને રિચાર્જ માટે પૂરતો સમય આપવામાં આવે.

આ નવી વ્યવસ્થા હેઠળ, જો કોઈ ગ્રાહકનું બેલેન્સ નેગેટિવમાં જાય છે, તો તેને સીધું કનેક્શન કાપવાને બદલે કુલ પાંચ વખત SMS દ્વારા એલર્ટ મોકલવામાં આવશે. આ ૩૦ દિવસની રાહત મળતા મધ્યમ વર્ગના પરિવારોમાં હાશકારો જોવા મળ્યો છે. સરકારના આ પગલાને સ્માર્ટ મીટર વિરુદ્ધ ચાલી રહેલા આંદોલનને શાંત પાડવાના પ્રયાસ તરીકે જોવામાં આવી રહ્યો છે.