નવી દિલ્હી, તા. ૨૫ : મધ્યપૂર્વમાં વધી રહેલા સુરક્ષા જોખમોને પગલે ભારતીય વિમાની કંપનીઓએ સાઉદી અરેબિયાનાં વિવિધ શહેરોની ફ્લાઇટો રદ કરવાની મુદત લંબાવી છે. એર ઇન્ડિયા અને એર ઇન્ડિયા એક્સપ્રેસની રિયાધ તથા દમામની સેવાઓ ૭ નવેમ્બર અને જેદ્દાહની સેવાઓ ૩૧ ઓક્ટોબર સુધી સ્થગિત રહેશે. અન્ય વિમાની કંપનીઓએ પણ કેટલીક ઉડાનો બંધ રાખવાની જાહેરાત કરી છે.

મધ્યપૂર્વમાં સતત વધી રહેલા ભૂરાજકીય તણાવ અને સુરક્ષાની અનિશ્ચિતતાને કારણે ભારતથી સાઉદી અરેબિયા જતાં પ્રવાસીઓની મુશ્કેલીઓ વધી છે. એર ઇન્ડિયા અને એર ઇન્ડિયા એક્સપ્રેસે શનિવારે જાહેરાત કરી હતી કે રિયાધ અને દમામ માટેની આવતી-જતી ફ્લાઇટો આગામી ૭ નવેમ્બર સુધી સ્થગિત રહેશે, જ્યારે જેદ્દાહની ફ્લાઇટો ૩૧ ઓક્ટોબર સુધી બંધ રાખવામાં આવશે.

વિમાની કંપનીઓએ જણાવ્યું છે કે ૨૪ ઓક્ટોબર કે તે પહેલાં ટિકિટ બુક કરાવનારા પાત્ર મુસાફરોને ફ્લાઇટ રદ થવાના સંજોગોમાં સંપૂર્ણ રિફંડ અથવા શરતોને આધીન વૈકલ્પિક મુસાફરીની સુવિધા આપવામાં આવશે. એર ઇન્ડિયાના રિયાધ અને દમામના અસરગ્રસ્ત મુસાફરો ૨૧ નવેમ્બર સુધી તથા જેદ્દાહના મુસાફરો ૧૪ નવેમ્બર સુધીની વૈકલ્પિક મુસાફરી માટે એક વખત નિઃશુલ્ક ફેરબુકિંગનો લાભ મેળવી શકશે.

બીજી તરફ ઇન્ડિગોએ રિયાધ, જેદ્દાહ, દમામ અને મદીનાની ફ્લાઇટો ૩૧ ઓક્ટોબર સુધી રદ રાખવાની જાહેરાત કરી છે. અકાસા એર દ્વારા રિયાધની સેવાઓ ૩૦ નવેમ્બર અને જેદ્દાહની સેવાઓ ૧૦ નવેમ્બર સુધી સ્થગિત કરવામાં આવી છે.

આ સ્થિતિની ખાસ અસર સાઉદી અરેબિયામાં કાર્યરત ભારતીયો, વેપારીઓ અને ઉમરાહ યાત્રાળુઓ પર પડી રહી છે. જેદ્દાહમાં ભારતીય વાણિજ્ય દૂતાવાસે અસરગ્રસ્ત ભારતીયોની મદદ માટે જેદ્દાહ અને મક્કામાં ચોવીસ કલાક કાર્યરત સહાય કેન્દ્રોની વ્યવસ્થા કરી છે. મુસાફરોને ભોજન, જરૂરી દવાઓ અને વતન પરત ફરવાની વ્યવસ્થા માટે સહયોગ આપવામાં આવી રહ્યો છે. વિમાની કંપનીઓએ મુસાફરોને વિમાનમથકે નીકળતાં પહેલાં પોતાની ફ્લાઇટની સ્થિતિ તપાસવા અપીલ કરી છે.