બ્લુ બેલ (પેન્સિલવેનિયા):  અમેરિકામાં વસતા ભારતીય સમુદાય માટે ગૌરવ લેવા જેવા સમાચાર સામે આવ્યા છે. પેન્સિલવેનિયાના બ્લુ બેલ ખાતે ભારતીય મંદિર દ્વારા 'ભારતીય લર્નિંગ સેન્ટર' (Bharatiya Learning Center) નું ભવ્ય ઉદ્ઘાટન કરવામાં આવ્યું છે. આ સેન્ટરનો મુખ્ય ઉદ્દેશ્ય અમેરિકામાં જન્મેલી અને ઉછરેલી નવી પેઢીને ભારતીય ભાષાઓ, ભવ્ય વારસા અને નૈતિક મૂલ્યો સાથે જોડી રાખવાનો છે. આશરે ૮.૫ મિલિયન ડોલર (અંદાજે ૭૧ કરોડ રૂપિયા) ના ખર્ચે તૈયાર થયેલું આ સેન્ટર આધુનિક સુવિધાઓથી સજ્જ છે.
૧૯૯૯માં જોયેલું સપનું આજે બન્યું હકીકત
આ પ્રોજેક્ટના મૂળ છેક ૧૯૯૯માં નંદ તોડી અને તેમના સાથીઓના મનમાં રોપાયા હતા. ત્રણ દાયકાની લાંબી રાહ અને સમુદાયના અવિરત સહયોગ બાદ આ સપનું સાકાર થયું છે. ઉદ્ઘાટન પ્રસંગે નંદ તોડીએ ભાવુક થતા જણાવ્યું કે, "આ લર્નિંગ સેન્ટર ત્રણ દાયકાની દ્રષ્ટિ, ખંત અને સમુદાયની એકતાનું પ્રતીક છે. અહીં આપણી સંસ્કૃતિનું જતન થશે અને ભવિષ્યની પેઢીઓ પોતાની ઓળખ સાથે જોડાયેલી રહેશે."
સાત ભારતીય ભાષાઓનું અપાશે શિક્ષણ
બ્લુ બેલના ડેકાલ્બ પાઈક ખાતે આવેલું આ સેન્ટર અત્યારે દર અઠવાડિયે ૨૦૦ જેટલા વિદ્યાર્થીઓને શિક્ષણ આપી રહ્યું છે. અહીં સંસ્કૃત, હિન્દી, ગુજરાતી, મરાઠી, કન્નડ, તેલુગુ અને તમિલ એમ સાત ભારતીય ભાષાઓ શીખવવામાં આવે છે. સેન્ટરનો અભ્યાસક્રમ સંસ્કૃતના સુપ્રસિદ્ધ શ્લોક "વિદ્યા દદાતિ વિનયમ્" (વિદ્યા વિનય આપે છે) ના સિદ્ધાંત પર આધારિત છે, જે વિદ્યાર્થીઓમાં જ્ઞાનની સાથે નમ્રતાના ગુણો કેળવવાનું કામ કરશે.
અમેરિકી રાજનેતાઓએ પણ આપ્યું મહત્વ
આ ભવ્ય સમારોહમાં ૩૦૦થી વધુ લોકો હાજર રહ્યા હતા, જેમાં અમેરિકી કોંગ્રેસમેન બ્રાયન ફિટ્ઝપેટ્રિક અને મોન્ટગોમેરી કાઉન્ટીના અધિકારી નીલ મખીજા મુખ્ય અતિથિ તરીકે ઉપસ્થિત રહ્યા હતા. ફિટ્ઝપેટ્રિકે ભારતીય સમુદાયના પ્રદાનને બિરદાવતા કહ્યું કે, પોતાની સંસ્કૃતિનું જતન કરતી કોમ અમેરિકાની વિવિધતા અને એકતામાં મોટો વધારો કરે છે. નોંધનીય છે કે, આ લર્નિંગ સેન્ટરની સિદ્ધિઓને અમેરિકી કોંગ્રેસના રેકોર્ડમાં પણ સ્થાન મળ્યું છે, જે તેની વૈશ્વિક અગત્યતા દર્શાવે છે.