નવી દિલ્હી, તા. ૧૫: ભારતમાં ગલીઓ અને મોહલ્લાઓમાં આવેલી કરિયાણાની નાની દુકાનો આપણા રોજિંદા જીવનનો એક અનિવાર્ય અને સામાન્ય હિસ્સો છે, પરંતુ વિદેશી નાગરિકો માટે આ નાની દુકાનોનો અનુભવ ખૂબ જ અદભુત અને આશ્ચર્યજનક હોય છે. હાલમાં જ દિલ્હીમાં રહેતી અમેરિકન કન્ટેન્ટ ક્રિએટર ક્રિસ્ટન ફિશરનો એક વીડિયો સોશિયલ મીડિયા પર ભારે વાયરલ થઈ રહ્યો છે, જેમાં તેણે ભારતની આ સ્થાનિક કરિયાણાની દુકાનોના મુક્તકંઠે વખાણ કરતાં તેને ભારતની વ્યવસ્થાની કરોડરજ્જુ સમાન ગણાવી છે.

વાયરલ થઈ રહેલા આ વીડિયોમાં ક્રિસ્ટન ફિશર સવારે પોતાના ઘર નજીક આવેલી નાની કરિયાણાની દુકાને દૂધ ખરીદવા માટે જતી નજરે પડે છે. તેણે પોતાના ફોલોઅર્સ સાથે અનુભવ શેર કરતા જણાવ્યું કે આ દુકાન તેના ઘરથી એક મિનિટ કરતાં પણ ઓછા અંતરે આવેલી છે અને તે પોતાની રોજિંદી જરૂરિયાતની અનેક ચીજવસ્તુઓ હંમેશાં આ જ આસપાસની દુકાનોમાંથી ખરીદે છે. નજીકમાંથી જ તમામ સામાન સરળતાથી મળી જવાની આ સુવિધા તેમને ખૂબ જ આકર્ષિત કરે છે.

ભારતીય બજાર વ્યવસ્થાની પ્રશંસા કરતાં ક્રિસ્ટને જણાવ્યું કે, અહીંથી જરૂરી વસ્તુઓ અત્યંત ઝડપથી અને કોઈ જ પરેશાની વગર મળી જાય છે. દુકાનમાંથી દૂધ ખરીદીને રોકડમાં નાણાં ચૂકવ્યા બાદ તે માત્ર એક જ મિનિટમાં ચાલીને પોતાના ઘરે પાછી પહોંચી જાય છે. તેમના મતે, ભારતની આ નાની-નાની દુકાનો સામાન્ય લોકોના રોજિંદા જીવનને અત્યંત સરળ અને આરામદાયક બનાવવામાં બહુ મોટો ભાગ ભજવે છે અને આ વ્યવસ્થા તેમને દિલથી ગમે છે.

સોશિયલ મીડિયા પર આ વીડિયો સામે આવ્યા બાદ યુઝર્સ તરફથી પણ રસપ્રદ પ્રતિક્રિયાઓ મળી રહી છે. અનેક ભારતીય યુઝર્સે ટિપ્પણી કરી હતી કે આપણે આપણા દેશમાં સહેલાઈથી મળતી આવી સુવિધાઓની ઘણીવાર કદર કરતા નથી હોતા. બીજી તરફ, કેટલાક વિદેશી યુઝર્સે લખ્યું કે પશ્ચિમી દેશો ખાસ કરીને અમેરિકામાં નાની ચીજવસ્તુઓ ખરીદવા માટે પણ ગાડી લઈને દૂર સુધી જવું પડે છે, જ્યારે ભારતમાં ઘરના ઉંબરે જ બધી સગવડો મળી રહે છે.

આ વાયરલ વીડિયો દ્વારા ફરી એકવાર સાબિત થઈ ગયું છે કે આપણા રોજિંદા જીવનમાં સાવ સામાન્ય લાગતી ભારતીય કરિયાણાની દુકાનો વિદેશીઓ માટે પણ આશ્ચર્ય અને આકર્ષણનું કેન્દ્ર બની શકે છે. ઘર નજીકથી જ સામાન મળવાની સગવડ અને દુકાનદારો સાથેનો આત્મીય વ્યવહાર ભારતીય બજાર સંસ્કૃતિની અનોખી ઓળખ સમાન છે.