ઇસ્લામાબાદ:અમેરિકા અને ઈરાન વચ્ચેના તણાવપૂર્ણ સંબંધોમાં પાકિસ્તાનની ભૂમિકાને લઈને નવો વિવાદ ઉભો થયો છે. અમેરિકાએ પાકિસ્તાન પર આરોપ લગાવ્યો છે કે તેણે ઈરાનના સૈન્ય વિમાનોને પોતાના સૈન્ય મથક પર આશરો આપીને અમેરિકી હુમલાઓથી બચાવ્યા છે. જોકે, પાકિસ્તાને આ વિમાનોની હાજરીનો સ્વીકાર કર્યો છે પરંતુ તેની પાછળના કારણો અંગે અમેરિકા કરતા તદ્દન અલગ સ્પષ્ટતા રજૂ કરી છે.

સીબીએસ ન્યૂઝ દ્વારા અમેરિકી અધિકારીઓના હવાલેથી અહેવાલ આપવામાં આવ્યો છે કે, એપ્રિલની શરૂઆતમાં ટ્રમ્પ દ્વારા ઈરાન સાથે યુદ્ધવિરામની જાહેરાત કરાયાના ગણતરીના દિવસોમાં જ ઈરાને પોતાના અનેક વિમાનો પાકિસ્તાનના રાવલપિંડી સ્થિત નૂર ખાન એરફોર્સ બેઝ પર મોકલી દીધા હતા. આ વિમાનોમાં ઈરાની વાયુસેનાનું RC-130 જાસૂસી વિમાન પણ સામેલ છે, જે જટિલ ગુપ્તચર માહિતી એકત્રિત કરવા માટે જાણીતું છે. અમેરિકી અધિકારીઓનું માનવું છે કે ઈરાને સંભવિત હવાઈ હુમલાઓથી પોતાની મિલકતો બચાવવા માટે આ વ્યૂહાત્મક પગલું ભર્યું છે.

બીજી તરફ, પાકિસ્તાનના વિદેશ મંત્રાલયે સત્તાવાર નિવેદન જારી કરીને જણાવ્યું છે કે, ઈરાન અને અમેરિકા વચ્ચે ચાલી રહેલી ઈસ્લામાબાદ શાંતિ વાટાઘાટોને સરળ બનાવવા માટે આ વિમાનો ત્યાં ઉતારવામાં આવ્યા હતા. પાકિસ્તાન મુજબ, રાજદ્વારી કર્મચારીઓ, સુરક્ષા ટીમો અને વહીવટી સ્ટાફની અવરજવર માટે બંને દેશોના વિમાનો પાકિસ્તાન આવ્યા હતા અને વાટાઘાટોના આગામી રાઉન્ડની અપેક્ષાએ કેટલાક વિમાનો કામચલાઉ ધોરણે ત્યાં રોકાયા છે. પાકિસ્તાની અધિકારીઓએ અમેરિકી આક્ષેપોને પાયાવિહોણા ગણાવતા કહ્યું કે, જે તે સમયે ઈરાનની અંદર પણ કોઈ વિમાનોને નિશાન બનાવાયા નહોતા, તો પછી તેને છુપાવવાનો પ્રશ્ન જ ઉભો થતો નથી.

આ ઘટના બાદ વોશિંગ્ટનમાં તીખી પ્રતિક્રિયા જોવા મળી છે. અમેરિકી સેનેટર લિન્ડસે ગ્રેહામે સોશિયલ મીડિયા પર પોસ્ટ કરીને જણાવ્યું છે કે, જો આ દાવા સાચા જણાશે તો મધ્યસ્થી તરીકે પાકિસ્તાનની ભૂમિકાનું પુનઃમૂલ્યાંકન કરવું પડશે. તેમણે ઇઝરાયેલ પ્રત્યેના પાકિસ્તાની સંરક્ષણ અધિકારીઓના જૂના નિવેદનોને ટાંકીને આ બાબત સાચી હોઈ શકે તેવી આશંકા વ્યક્ત કરી છે. જોકે, આ મુદ્દે વ્હાઇટ હાઉસ અને યુએસ સેન્ટ્રલ કમાન્ડે હાલમાં કોઈ પણ ટિપ્પણી કરવાનો ઇનકાર કર્યો છે.

પાકિસ્તાન અત્યારે અમેરિકા, ઈરાન, અખાતી દેશો અને ચીન સાથેના સંબંધો જાળવી રાખીને પ્રાદેશિક સંઘર્ષથી દૂર રહેવાનો પ્રયાસ કરી રહ્યું છે. પાકિસ્તાને એપ્રિલમાં ઈસ્લામાબાદમાં યુએસ-ઈરાન વાટાઘાટોના પ્રથમ રાઉન્ડની સુવિધા પૂરી પાડી હતી અને પાકિસ્તાની આર્મી ચીફે તાજેતરમાં જ ઈરાનના વિદેશ મંત્રી સાથે મુલાકાત કરી હતી. હાલમાં ઈરાની સૈન્ય જાસૂસી વિમાનો પાકિસ્તાની ધરતી પર છે તે બાબત બંને પક્ષે સ્વીકારવામાં આવી છે, પરંતુ તેના હેતુ અંગે બંને દેશોના દાવા પરસ્પર વિરોધાભાસી છે.