મુંબઈ, તા.૦૭: વિશ્વના સૌથી ધનવાન અને પ્રભાવશાળી પરિવારોમાંથી એક એવો અંબાણી પરિવાર જ્યારે પણ કોઈ ઈવેન્ટમાં હાજરી આપે છે, ત્યારે તેમની રોયલ લાઈફસ્ટાઈલ અને ફેશન સેન્સ મોટી મોટી બોલિવૂડ અભિનેત્રીઓને પણ પાછળ છોડી દે છે. તાજેતરમાં જ દેશના જાણીતા અને દિગ્ગજ ફેશન ડિઝાઈનર અબુ જાની (Abu Jani) ની બર્થડે પાર્ટીનું ભવ્ય આયોજન કરવામાં આવ્યું હતું. આ હાઈ-પ્રોફાઈલ ઈવેન્ટમાં બોલિવૂડથી લઈને બિઝનેસ જગતની જાણીતી હસ્તીઓએ શિરકત કરી હતી, પરંતુ સમગ્ર પાર્ટીમાં સૌથી વધુ ચર્ચા અંબાણી પરિવારની મહિલાઓના અલ્ટ્રા-ગ્લેમરસ અને રોયલ અવતારની રહી હતી.

આ ખાસ સાંજે સાસુ, વહુઓ અને દીકરી એટલે કે નીતા અંબાણી, ઈશા અંબાણી, શ્લોકા મહેતા અને રાધિકા મર્ચન્ટના આઉટફિટ્સે મહેફિલમાં ચાર ચાંદ લગાવી દીધા હતા. નીતા અંબાણીએ બ્રાઈટ રેડ (લાલ) કલરની ભવ્ય સાડી પસંદ કરી હતી, જેમાં બારીક એમ્બ્રોઈડરી અને મિનિમલ જ્વેલરી સાથે તેમનો ક્લાસિક રોયલ લુક નીખરી ઊઠ્યો હતો. બીજી તરફ, ઈશા અંબાણીએ પાર્ટીની થીમને અનુરૂપ શાઈનિંગ સિલ્વર-વ્હાઈટ કલરનો હેવી ફિટેડ ડ્રેસ પહેર્યો હતો, જેને તેમણે સ્ટેટમેન્ટ ડાયમંડ નેકલેસ સાથે સ્ટાઈલ કર્યો હતો.

પરિવારની મોટી વહુ શ્લોકા મહેતાએ આઈવરી અને ગોલ્ડન રંગના કઢાઈદાર આઉટફિટમાં મોર્ડન અને ટ્રેડિશનલનું અદભુત મિશ્રણ રજૂ કર્યું હતું. જ્યારે નાની વહુરાણી રાધિકા મર્ચન્ટ સફેદ અને જાંબલી (White & Purple) કલરના ફ્લોરલ એમ્બ્રોઈડરી વાળા ટ્રેડિશનલ ડ્રેસમાં અત્યંત આકર્ષક અને સુંદર દેખાઈ રહી હતી. સોશિયલ મીડિયા પર અંબાણી પરિવારના આ ગ્લેમરસ અવતારનો વીડિયો ઝડપથી વાયરલ થઈ રહ્યો છે અને ફેન્સ તેમના લુક પર પ્રશંસાનો વરસાદ વરસાવી રહ્યા છે.