​ફગવાડા: પંજાબના ફગવાડા સ્થિત આવેલી દેશની અગ્રણી લવલી પ્રોફેસર યુનિવર્સિટી (LPU) કેમ્પસમાં એક છાત્રા સાથે થયેલી કથિત યૌન ઉત્પીડનની શરમજનક ઘટના સામે આવ્યા બાદ વાતાવરણ અત્યંત તંગ બની ગયું છે. આ ગંભીર બનાવના વિરોધમાં હજારોની સંખ્યામાં વિદ્યાર્થીઓ રસ્તા પર ઉતરી આવ્યા હતા અને યુનિવર્સિટી પ્રશાસન સામે ઉગ્ર વિરોધ પ્રદર્શન શરૂ કર્યું હતું. આક્રોશિત વિદ્યાર્થીઓએ કેમ્પસની અંદર તોડફોડ મચાવીને કડક કાર્યવાહી અને ન્યાયની માગ સાથે ભારે સૂત્રોચ્ચાર કર્યા હતા.

​વિદ્યાર્થીઓનો રોષ એટલી હદે વધી ગયો હતો કે તેઓએ કેમ્પસની બહાર નીકળીને વ્યસ્ત ગણાતા ચંદીગઢ-અમૃતસર રાષ્ટ્રીય ધોરીમાર્ગ (National Highway) પર ચક્કાજામ કરી દીધો હતો. હાઇવે પર વિદ્યાર્થીઓના ધરણા અને વિરોધ પ્રદર્શનના કારણે બંને તરફ વાહનોની લાંબી કતારો લાગી ગઈ હતી અને વાહનવ્યવહાર કલાકો સુધી સંપૂર્ણપણે ઠપ્પ થઈ ગયો હતો, જેનાથી સામાન્ય મુસાફરોને ભારે હાલાકી ભોગવવી પડી હતી.

​ઘટનાની ગંભીરતાને ધ્યાનમાં રાખીને સ્થાનિક પોલીસ અને ઉચ્ચ પોલીસ અધિકારીઓનો મોટો કાફલો તાત્કાલિક અસરથી ઘટનાસ્થળે દોડી ગયો હતો. પોલીસે ઉશ્કેરાયેલા વિદ્યાર્થીઓને સમજાવીને પરિસ્થિતિ પર કાબૂ મેળવવા અને નેશનલ હાઇવે પરનો વાહનવ્યવહાર પૂર્વવત કરાવવાના પ્રયાસો હાથ ધર્યા છે. હાલ કેમ્પસ સહિત આસપાસના વિસ્તારમાં કોઈ અનિચ્છનીય બનાવ ના બને તે માટે ચુસ્ત પોલીસ બંદોબસ્ત ગોઠવી દેવામાં આવ્યો છે અને કથિત ઘટના અંગે ઊંડાણપૂર્વક તપાસ શરૂ કરવામાં આવી છે.