​વોશિંગ્ટન / અમદાવાદ: અમેરિકામાં ભારતીય સમુદાય અને હિન્દુ ધાર્મિક સ્થળોને નિશાન બનાવવાની ઘટનાઓ અટકવાનું નામ નથી લઈ રહી. તાજેતરમાં સામે આવેલી એક હૃદયદ્રાવક અને ચિંતાજનક ઘટનામાં અમેરિકાના ઓહાયો રાજ્યમાં આવેલા એક પ્રખ્યાત હિન્દુ મંદિર પર અજાણ્યા અસામાજિક તત્વો દ્વારા હુમલો કરવામાં આવ્યો છે. ઓહાયોના રિચમંડ હાઇટ્સ (ગ્રેટર ક્લેવલેન્ડ વિસ્તાર) ખાતે સ્થિત 'શ્રી સ્વામિનારાયણ વડતાલ ધામ હિન્દુ મંદિર'ને નિશાન બનાવી તેના પર ઇંટો ફેંકવામાં આવી હતી, જેના કારણે મંદિરની કાચની બારીઓ તૂટી ગઈ હતી અને સંપત્તિને ભારે નુકસાન પહોંચ્યું હતું.

​અમેરિકા સ્થિત હિન્દુ સંગઠનો 'કોએલિશન ઓફ હિન્દુઝ ઓફ નોર્થ અમેરિકા' (CoHNA) અને 'હિન્દુ અમેરિકન ફાઉન્ડેશન' (HAF) દ્વારા સોશિયલ મીડિયા પર આ ઘટના અંગે માહિતી આપીને ઘોર નિંદા કરવામાં આવી છે. મળતી વિગતો અનુસાર, આ હુમલો બપોરના આશરે ૧:૩૦ વાગ્યાના સુમારે થયો હતો. સૌથી ગંભીર બાબત એ છે કે જ્યારે બદમાશો દ્વારા મંદિર પર ભારે પથ્થરમારો અને ઇંટો ફેંકવામાં આવી રહી હતી, ત્યારે મંદિર પરિસરની અંદર પૂજારીઓ અને કેટલાક શ્રદ્ધાળુઓ હાજર હતા. સદનસીબે આ બનાવમાં કોઈને શારીરિક ઈજા પહોંચી ન હતી, પરંતુ આ ઘટનાથી સ્થાનિક હિન્દુ સમુદાયમાં ભારે ભય અને અસુરક્ષાની લાગણી વ્યાપી ગઈ છે.

​સ્થાનિક સત્તાવાળાઓ અને પોલીસ વિભાગ દ્વારા આ મામલે ગુનો નોંધીને તપાસ શરૂ કરી દેવામાં આવી છે. અમેરિકાના વિવિધ હિન્દુ સમુદાયિક જૂથોએ સ્થાનિક કાયદા અમલીકરણ એજન્સીઓ પાસે માંગ કરી છે કે આ ઘટનાને માત્ર તોડફોડ તરીકે ન જોતા 'હેટ ક્રાઇમ' (નફરતપ્રેરિત ગુનો) ગણીને તપાસ કરવામાં આવે અને દોષિતો સામે કડકમાં કડક કાર્યવાહી કરવામાં આવે.

​ઉલ્લેખનીય છે કે, છેલ્લા કેટલાક સમયથી અમેરિકા અને કેનેડા જેવા દેશોમાં હિન્દુ મંદિરો અને ભારતીય સમુદાયના સ્થળોને નિશાન બનાવવાની ઘટનાઓમાં સતત વધારો નોંધાયો છે. 'હિન્દુ અમેરિકન ફાઉન્ડેશન' (HAF) એ ચિંતા વ્યક્ત કરતા જણાવ્યું છે કે હિન્દુ વિરોધી નફરત અને ઝેર ઓકવાની પ્રવૃત્તિઓ ચરમસીમાએ પહોંચી રહી છે, જેની સીધી અસર નિર્દોષ શ્રદ્ધાળુઓ અને ધાર્મિક સ્થળોની સુરક્ષા પર પડી રહી છે. હિન્દુ સંગઠનોએ અમેરિકન સરકાર અને સ્થાનિક પ્રશાસનને વિનંતી કરી છે કે ધાર્મિક સ્થળોની સુરક્ષા મજબૂત કરવામાં આવે જેથી ભવિષ્યમાં આવી અપ્રિય ઘટનાઓ રોકી શકાય.