ચંદીગઢ, તા.૦૬: શિરોમણી અકાલી દળ (SAD) અને ભાજપ વચ્ચે ફરીથી ગઠબંધન થવાની અટકળો વચ્ચે પંજાબના રાજકારણમાં એકાએક મોટો ધડાકો થયો છે, જ્યાં પંજાબ સરકારના વિજિલન્સ બ્યુરોએ એન્ફોર્સમેન્ટ ડિરેક્ટોરેટ (ED) ને સત્તાવાર પત્ર લખીને અકાલી નેતા અને પૂર્વ મંત્રી વિક્રમ સિંહ મજીઠિયા સંકળાયેલા અંદાજે ૭૩૬.૯૬ કરોડ રૂપિયાના મની લોન્ડરિંગ કેસમાં ગુનો નોંધીને કાનૂની તપાસ હાથ ધરવાની જોરદાર માંગ કરી છે.

રાજકીય વિશ્લેષકો આ પગલાંને એક અત્યંત ચતુર 'રાજકીય ગૂગલી' ગણાવી રહ્યા છે, કારણ કે પંજાબમાં વિજિલન્સ બ્યુરો 'આપ' સરકાર હસ્તક છે જ્યારે ED કેન્દ્રની ભાજપ સરકાર હેઠળ કામ કરે છે, જેથી રાજ્ય સરકારે કેન્દ્રીય એજન્સી સમક્ષ તપાસના તારણો મૂકીને અકાલી નેતા સામે કાર્યવાહી કરવાની જવાબદારી કેન્દ્રના દરબારમાં ધકેલી દીધી છે.

વિજિલન્સ બ્યુરોના પ્રવક્તા દ્વારા જાહેર કરાયેલી વિગતો અનુસાર, તપાસમાં એક વ્યાપક નાણાકીય નેટવર્કનો પર્દાફાશ થયો છે જેમાં પરિવારના સભ્યો, નજીકના સહયોગીઓ, સાયપ્રસ અને સિંગાપોર સહિતની વિદેશી સંસ્થાઓ અને અનેક શંકાસ્પદ કંપનીઓ દ્વારા બેહિસાબી સંપત્તિ ઊભી કરવા અને તેને છુપાવવાના કાવતરાનો ખુલાસો થયો છે.

તપાસમાં વિક્રમ મજીઠિયાને આ સમગ્ર કથિત ડ્રગ મની ટ્રેલ અને નાણાકીય નેટવર્કના 'માસ્ટરમાઇન્ડ' તરીકે ઓળખવામાં આવ્યા છે, જ્યાં ડ્રગ્સના વેચાણથી પેદા થયેલા નાણાંને પ્રોપર્ટીઝ, વિમાન અને વિવિધ રોકાણોમાં રૂપાંતરિત કરીને તેનો મુખ્ય લાભાર્થી મજીઠિયા રહ્યો હોવાનું વિજિલન્સના અહેવાલમાં જણાવવામાં આવ્યું છે.

બીજી તરફ વિક્રમ સિંહ મજીઠિયાએ આ તમામ ભ્રષ્ટાચાર અને મની લોન્ડરિંગના આરોપોને સદંતર ફગાવી દીધા છે અને દાવો કર્યો છે કે કાયદાકીય અદાલતમાં આ પાયાવિહોણા આરોપો ક્યારેય ટકી શકશે નહીં અને આ બધું માત્ર રાજકીય બદઈરાદાથી કરવામાં આવી રહ્યું છે.
 

આ અગાઉ પણ પંજાબ અને દિલ્હીમાં 'આપ'ના અનેક શીર્ષ નેતાઓ સામે કેન્દ્રીય તપાસ એજન્સીઓ દ્વારા સકંજા કસવામાં આવ્યો છે, ત્યારે પંજાબ વિજિલન્સ બ્યુરો દ્વારા એક વરિષ્ઠ અકાલી નેતાની તપાસ માટે કેન્દ્રીય એજન્સીને લખાયેલા આ પત્રથી પંજાબના રાજકારણમાં ભારે ગરમાવો આવી ગયો છે અને હવે સૌની નજર એ વાત પર ટકેલી છે કે ED આ મામલે કેટલી તત્પરતાથી કાર્યવાહી કરે છે.