મેડ્રિડ, તા. 28: વિદેશ પ્રવાસ કે હવાઈ મુસાફરીના શોખીનો માટે એક મહત્વના અને ચિંતાજનક સમાચાર સામે આવ્યા છે. સ્પેન સરકારે વિશ્વભરના પ્રવાસીઓને એક ખાસ એડવાઈઝરી જારી કરીને સલાહ આપી છે કે જો તેઓ આગામી સમયમાં મુસાફરી કરવાનું વિચારી રહ્યા હોય, તો વિમાનની ટિકિટો વહેલી તકે બુક કરાવી લેવી જોઈએ. આ પાછળનું મુખ્ય કારણ મધ્ય પૂર્વમાં ચાલી રહેલું ઈરાન અને ઈઝરાયેલ વચ્ચેનું યુદ્ધ છે, જેણે વૈશ્વિક સ્તરે તેલના બજારમાં હલચલ મચાવી દીધી છે.
ક્રૂડ ઓઈલ અને મોંઘી ટિકિટોનો સીધો સંબંધ
સ્પેનના ઉદ્યોગ અને પ્રવાસન મંત્રીએ પ્રવાસીઓને સંબોધતા સ્પષ્ટ શબ્દોમાં કહ્યું છે કે, "એરલાઇન ટિકિટો અત્યારે જ ખરીદી લો." મંત્રીના જણાવ્યા અનુસાર, ઈરાન સાથેના સંઘર્ષને કારણે આંતરરાષ્ટ્રીય બજારમાં ક્રૂડ ઓઈલના ભાવમાં મોટો ઉછાળો આવ્યો છે. એરલાઈન્સ માટે વિમાનનું ઈંધણ (Aviation Fuel) એ તેમના ખર્ચનો સૌથી મોટો ભાગ હોય છે. જ્યારે ઈંધણના ભાવ વધે છે, ત્યારે એરલાઈન્સ કંપનીઓ આ વધારાનો બોજ સીધો મુસાફરો પર નાખે છે, જેનાથી ટિકિટના દરો આસમાને પહોંચી શકે છે.
આગામી મહિનાઓમાં મુસાફરી કરવી મોંઘી પડશે
રોઇટર્સના અહેવાલ મુજબ, ભૌગોલિક રાજકીય તણાવને કારણે ઉર્જા બજારો પર ભારે દબાણ છે. જો આ યુદ્ધ લાંબો સમય ચાલશે, તો હવાઈ ભાડામાં એટલો વધારો થઈ શકે છે કે સામાન્ય મુસાફરો માટે તે પરવડવું મુશ્કેલ બની જશે. ખાસ કરીને વેકેશન સીઝન પહેલા સ્પેન જેવી મોટી પ્રવાસન સત્તા તરફથી મળેલી આ ચેતવણી સૂચવે છે કે આગામી મહિનાઓમાં પ્રવાસન ઉદ્યોગ પર મોટી અસર થવાની શક્યતા છે.
મુસાફરોમાં ચિંતાનો માહોલ
આ સમાચાર બાદ પ્રવાસીઓમાં ભારે ચિંતા જોવા મળી રહી છે. સામાન્ય રીતે લોકો છેલ્લી ઘડીએ પ્લાનિંગ કરતા હોય છે, પરંતુ હવે જે રીતે તેલના ભાવમાં અસ્થિરતા જોવા મળી રહી છે, તે જોતા સ્માર્ટ ટ્રાવેલર્સ વહેલું બુકિંગ કરાવીને પોતાના હજારો રૂપિયા બચાવી રહ્યા છે. જો તમે પણ કોઈ ટ્રીપનું વિચારી રહ્યા હોવ, તો મોડું કરવા કરતા અત્યારે જ બુકિંગ કરી લેવું એ બુદ્ધિમાનીનું કામ રહેશે.