મુંબઈ : ભારતમાં હવાઈ સફર કરનારા મુસાફરો માટે ફ્લાઇટ રદ થવી અને રિફંડ મેળવવામાં પડતી મુશ્કેલીઓ હવે મોટી માથાકૂટ બની ગઈ છે. નાગરિક ઉડ્ડયન રાજ્યમંત્રી મુરલીધર મોહોલે રાજ્યસભામાં રજૂ કરેલા સત્તાવાર ડેટા અનુસાર, વર્ષ ૨૦૨૫ માં કોમર્શિયલ એરલાઇન્સ સામે રિફંડ સંબંધિત ફરિયાદો વધીને ૪,૩૮૬ પર પહોંચી ગઈ છે – જે ૨૦૨૪ માં નોંધાયેલી ૧,૩૧૫ ફરિયાદોની સરખામણીએ સીધી ત્રણ ગણી વધારે છે.

મંત્રાલયના સૂત્રો મુજબ, ફરિયાદોમાં થયેલા આ અભૂતપૂર્વ વધારા પાછળ દેશની સૌથી મોટી એરલાઇન 'ઇન્ડિગો' (IndiGo) નું ઓપરેશનલ ભંગાણ મુખ્ય કારણ રહ્યું છે.

ઇન્ડિગોની ૫,૬૮૯ ફ્લાઇટ્સ રદ અને રેકોર્ડબ્રેક દંડ

ડિસેમ્બર ૨૦૨૫ માં ફ્લાઇટ ડ્યુટી ટાઇમ લિમિટેશન (FDTL) ના નવા નિયમો અને ઓપરેશનલ ગોટાળાને કારણે ઇન્ડિગોની આશરે ૫,૬૮૯ ફ્લાઇટ્સ રદ કરવી પડી હતી. આ ગંભીર બેદરકારી બદલ ડિરેક્ટોરેટ જનરલ ઓફ સિવિલ એવિએશન (DGCA) દ્વારા એરલાઇન પર ₹૨૨.૨ કરોડનો ઐતિહાસિક દંડ ફટકારવામાં આવ્યો હતો.

ગ્રાહકોના રક્ષણ માટે 'PACR' ની સ્થાપના

રાજ્યસભા સાંસદ ઘનશ્યામ તિવારીના પ્રશ્નનો જવાબ આપતાં મંત્રાલયે જણાવ્યું કે, મુસાફરોના હકોના રક્ષણ માટે કાયમી પેસેન્જર સહાય નિયંત્રણ ખંડ (PACR) ની સ્થાપના કરવામાં આવી છે. આ કંટ્રોલ રૂમમાં MoCA, DGCA, AAI અને તમામ એરલાઇન્સના પ્રતિનિધિઓ સાથે મળીને ફ્લાઇટ વિલંબ, રદ્દીકરણ, સામાનની સમસ્યાઓ અને રિફંડ પ્રક્રિયાનું રીયલ-ટાઇમ મોનિટરિંગ કરી રહ્યા છે.

DGCA એ સ્પષ્ટ કર્યું છે કે એરલાઇન્સ દ્વારા સમયસર રિફંડ ના આપવા અથવા પેસેન્જર ચાર્ટરના ઉલ્લંઘન બદલ આગામી દિવસોમાં વધુ કડક અમલીકરણ પગલાં લેવામાં આવશે.