નવી દિલ્હી,: ભારતની પ્રીમિયર એરલાઇન્સ પૈકીની એક એર ઈન્ડિયાએ આ વર્ષે મે થી જુલાઈ દરમિયાન તેની આંતરરાષ્ટ્રીય ફ્લાઈટ્સમાં ઘટાડો કરવાનો નિર્ણય લીધો છે. જેટ ફ્યુઅલ (વિમાનના ઈંધણ) ના ભાવમાં થયેલો તોતિંગ વધારો અને પશ્ચિમ એશિયામાં ચાલી રહેલા સંઘર્ષને કારણે પ્રતિબંધિત હવાઈ ક્ષેત્ર આ નિર્ણય પાછળના મુખ્ય કારણો છે.
૨૨,૦૦૦ કરોડનું જંગી નુકસાન
એક અહેવાલ મુજબ, ૩૧ માર્ચ ૨૦૨૬ ના રોજ પૂરા થયેલા નાણાકીય વર્ષમાં એર ઈન્ડિયા ગ્રુપને ૨૨,૦૦૦ કરોડ રૂપિયાથી વધુનું નુકસાન થયું હોવાનો અંદાજ છે. પશ્ચિમ એશિયાના સંઘર્ષને કારણે એરલાઇન્સને ઘણા આંતરરાષ્ટ્રીય સ્થળો માટે લાંબા રૂટ લેવા પડે છે, જેના પરિણામે ઈંધણનો વપરાશ અને ખર્ચ બંનેમાં વધારો થયો છે. એર ઈન્ડિયા જૂન મહિનામાં યુરોપ, ઉત્તર અમેરિકા, ઓસ્ટ્રેલિયા અને સિંગાપોરની સેવાઓમાં કાપ મુકશે.
સીઈઓનો કર્મચારીઓને સંદેશ
એર ઈન્ડિયાના આઉટગોઇંગ સીઈઓ અને મેનેજિંગ ડિરેક્ટર કેમ્પબેલ વિલ્સને કર્મચારીઓને મોકલેલા સંદેશમાં જણાવ્યું હતું કે, ઘણી આંતરરાષ્ટ્રીય ફ્લાઈટ્સ હવે નુકસાનકારક બની ગઈ છે અને તેને ચાલુ રાખવાથી નુકસાનમાં વધુ વધારો થશે. તેમણે ઉમેર્યું કે, "જેટ ફ્યુઅલના ભાવમાં થયેલો ધરખમ વધારો અને લાંબા ઉડાન રૂટને કારણે અમારી પાસે જૂન અને જુલાઈ માટે શેડ્યૂલમાં કાપ મૂકવા સિવાય કોઈ વિકલ્પ બચ્યો નથી". જોકે, ડોમેસ્ટિક (સ્થાનિક) ફ્લાઈટ્સ પર આની અસર પ્રમાણમાં ઓછી જોવા મળી છે.
ટિકિટના ભાવ વધારવા છતાં રાહત નહીં
એરલાઇન્સે વધતા ખર્ચને સરભર કરવા માટે એરફેર (ટિકિટના ભાવ) માં વધારો કર્યો છે અને ફ્યુઅલ સરચાર્જ પણ લાદ્યો છે, પરંતુ આ પગલાં પણ ખાસ મદદરૂપ સાબિત થયા નથી. સીઈઓના જણાવ્યા મુજબ, ભાડામાં અમુક મર્યાદાથી વધુ વધારો કરી શકાતો નથી કારણ કે તેનાથી ગ્રાહકોની માંગ પર સીધી અસર પડે છે. ફેડરેશન ઓફ ઈન્ડિયન એરલાઇન્સે પણ સરકારને પત્ર લખીને જણાવ્યું છે કે વર્તમાન ઈંધણના ભાવે ફ્લાઈટ્સનું સંચાલન કરવું "સંપૂર્ણપણે અપ્રસ્તુત" (unviable) બની ગયું છે.