નવી દિલ્હી :   આગામી તહેવારોની મોસમ અને રજાઓને ધ્યાનમાં રાખીને એર ઇન્ડિયા એક્સપ્રેસે વિદ્યાર્થીઓ માટે એક વિશેષ અને આકર્ષક ઓફર જાહેર કરી છે. આ સ્પેશિયલ સ્ટુડન્ટ ફેયર  હેઠળ, અભ્યાસ અર્થે કે રજાઓમાં મુસાફરી કરતા વિદ્યાર્થીઓને ડોમેસ્ટિક ફ્લાઇટ ટિકિટના બેઝ ફેયર પર સીધું ૧૦ ટકાનું ડિસ્કાઉન્ટ આપવામાં આવી રહ્યું છે. આ ઉપરાંત, સામાન્ય મુસાફરો માટેની ૧૫ કિલોની ચેક-ઇન સામાન મર્યાદાના બદલે વિદ્યાર્થીઓ વધારાના ૧૦ કિલો એટલે કે કુલ ૨૫ કિલો સુધીનો સામાન મફતમાં સાથે લઈ જઈ શકશે.

એરલાઇનની સત્તાવાર વેબસાઇટ અને મોબાઇલ એપ્લિકેશન દ્વારા સીધું બુકિંગ કરનાર વિદ્યાર્થીઓને મુસાફરીના સમયપત્રકમાં સુગમતા રહે તે માટે માત્ર ₹૯૯ ના નજીવા દરે ફ્લાઇટની તારીખ બદલવાની  વિશેષ સુવિધા પણ આપવામાં આવી રહી છે. આ ઓફરનો લાભ લેવા માટે વિદ્યાર્થીની ઉંમર ઓછામાં ઓછી ૧૨ વર્ષની હોવી આવશ્યક છે. મુસાફરી દરમિયાન અને એરપોર્ટ પર ચેક-ઇન કરતી વખતે વિદ્યાર્થીએ પોતાની માન્ય શૈક્ષણિક સંસ્થા દ્વારા જારી કરાયેલું મૂળ ફોટો આઇડી કાર્ડ રજૂ કરવાનું રહેશે, જેમાં તેમનું નામ અને જન્મતારીખ સ્પષ્ટ હોવી જરૂરી છે.

આ સિવાય, એર ઇન્ડિયા એક્સપ્રેસ પોતાની વેબસાઇટ અને એપ પર ડાયરેક્ટ બુકિંગ કરનારા અન્ય મુસાફરો માટે પણ પ્રોમોશનલ ઓફર્સ આપી રહી છે. જેમાં પાત્ર વિઝા ડેબિટ કે ક્રેડિટ કાર્ડનો ઉપયોગ કરીને બુકિંગ કરવા પર પ્રતિ પેસેન્જર ₹૬૦૦ સુધીની છૂટ આપવામાં આવી રહી છે. ઘર અને કોલેજ કે શૈક્ષણિક સંસ્થા વચ્ચે સતત વિમાન પ્રવાસ કરતા વિદ્યાર્થીઓ માટે એર ઇન્ડિયા એક્સપ્રેસની આ પહેલથી મુસાફરી વધુ સરળ અને ખર્ચ-અસરકારક બનશે.