નવી દિલ્હી : વિશ્વભરમાં એવિએશન ટર્બાઇન ફ્યુઅલ (ATF) ના ભાવમાં નોંધપાત્ર વધારો થવાને કારણે એર ઈન્ડિયા અને એર ઈન્ડિયા એક્સપ્રેસ દ્વારા સ્થાનિક તેમજ આંતરરાષ્ટ્રીય વન-વે ફ્લાઈટ્સ માટે ફ્યુઅલ સરચાર્જમાં ફેરફાર કરવાની જાહેરાત કરવામાં આવી છે. આ નવા દરો 9 ઓક્ટોબરથી અમલમાં આવશે, જેનાથી મુસાફરોની હવાઈ મુસાફરી પર વધારાનો આર્થિક બોજ પડશે.

પશ્ચિમ એશિયાના ભૌગોલિક-રાજકીય ઘટનાક્રમો અને ઈંધણના વધતા ખર્ચને પગલે અગાઉ ઇન્ડિગો દ્વારા પણ તેના ફ્યુઅલ ચાર્જમાં વધારો કરવામાં આવ્યો હતો. આ શૃંખલામાં આગળ વધતા આકાસા એરે પણ 9 ઓક્ટોબરથી મધ્યરાત્રિ પછીના તમામ નવા બુકિંગ માટે સ્થાનિક અને પસંદગીના આંતરરાષ્ટ્રીય રૂટ્સ પર નવો ફ્યુઅલ સરચાર્જ લાગુ કરવાનો નિર્ણય લીધો છે.

સુધારેલા માળખા અનુસાર, એર ઈન્ડિયા અને એર ઈન્ડિયા એક્સપ્રેસ દ્વારા 500 કિમી સુધીની ઘરેલું ફ્લાઈટ્સ માટે 400 રૂપિયા, 501 થી 1,000 કિમી માટે 600 રૂપિયા અને 1,001 થી 1,500 કિમી માટે 850 રૂપિયાનો સરચાર્જ વસૂલવામાં આવશે. જ્યારે આકાસા એર દ્વારા સ્થાનિક મુસાફરો માટે 500 કિમી સુધી 375 રૂપિયા અને તેનાથી વધુ અંતર માટે ક્રમશઃ 600 રૂપિયાથી લઈને 1,150 રૂપિયા સુધીનો ચાર્જ નક્કી કરવામાં આવ્યો છે.

આંતરરાષ્ટ્રીય રૂટ્સની વાત કરીએ તો, એર ઈન્ડિયા ઉત્તર અમેરિકા માટે 215 ડૉલર, ઓસ્ટ્રેલિયા માટે 210 ડૉલર, યુરોપ માટે 135 ડૉલર અને પશ્ચિમ એશિયા માટે 55 ડૉલરનો સરચાર્જ વસૂલશે. બીજી તરફ, આકાસા એર દ્વારા કુવૈત, કતાર, સાઉદી અરેબિયા, સંયુક્ત આરબ અમીરાત, થાઈલેન્ડ અને વિયેતનામ વચ્ચેની પસંદગીની આંતરરાષ્ટ્રીય ફ્લાઇટ્સ પર 2,500 રૂપિયાનો સરચાર્જ લાગુ કરવામાં આવ્યો છે.

એવિએશન ક્ષેત્રના નિષ્ણાતોના મતે, તાજેતરના મહિનાઓમાં ઇંધણના માસિક ખર્ચમાં 14 ટકાથી વધુનો ઉછાળો આવ્યો છે, જેણે છેલ્લા એક દાયકાના સર્વોચ્ચ સ્તરને સ્પર્શ કર્યો છે. એરલાઈન્સ કંપનીઓનું કહેવું છે કે વૈશ્વિક પરિસ્થિતિઓને ધ્યાનમાં રાખીને આ સરચાર્જની સમયાંતરે સમીક્ષા કરવામાં આવશે.

આ વધારાને કારણે મુસાફરોએ હવે ફ્લાઈટ ટિકિટ બુક કરતી વખતે વધારાના ખર્ચનો સામનો કરવો પડશે, અને આગામી સમયમાં હવાઈ ટિકિટોના ભાવો પર પણ તેની સીધી અસર જોવા મળી શકે છે.