​નવી દિલ્હી: રાજધાનીના ઐતિહાસિક વિરોધ સ્થળ જંતર-મંતર ખાતે આયોજિત વિરોધ પ્રદર્શન દરમિયાન થયેલી હિંસા અને મારામારીના એક જૂના કેસમાં સોશિયલ મીડિયા પર વાયરલ થયેલા એક સનસનાટીભર્યા વીડિયોએ રાજકીય ગરમાવો લાવી દીધો છે. સોશિયલ મીડિયા પર ખુલ્લેઆમ વાયરલ થઈ રહેલી એક ક્લિપમાં આરોપી વ્યક્તિ દાવો કરી રહ્યો છે કે તેણે પ્રદર્શનકારી વિદ્યાર્થીનીના પિતા પર જીવલેણ હુમલો કરીને તેમની ખોપડી ફોડી નાખી હતી અને તેમને સાઠ જેટલા ટાંકા આવ્યા હતા, છતાં રાજકીય વગ અને ઉચ્ચ સ્તરીય નેતાઓના સપોર્ટના કારણે તેને જેલ જવું પડ્યું નથી.

​આ વાયરલ વીડિયો સામે આવ્યા બાદ વિપક્ષી નેતાઓએ દિલ્હી પોલીસ અને સત્તાધારી પક્ષ સામે મોરચો માંડ્યો છે. કોંગ્રેસ નેતા રાહુલ ગાંધી, આમ આદમી પાર્ટીના વડા અરવિંદ કેજરીવાલ તેમજ તૃણમૂલ કોંગ્રેસના સાંસદ મહુઆ મોઇત્રા સહિતના નેતાઓએ આ મુદ્દે સરકાર પર તીખા પ્રહારો કર્યા છે. વિપક્ષનો આરોપ છે કે સામાન્ય નાગરિકો અને વિદ્યાર્થીઓ સામે કડક વલણ અપનાવતી દિલ્હી પોલીસ રાજકીય સંરક્ષણ ધરાવતા ગુનાહિત તત્વો સામે હળવા પગલાં લઈ રહી છે અને તેના કારણે જ ગંભીર ગુનો આચરનાર આરોપીઓ ખુલ્લામાં ફરી રહ્યા છે.

​બીજી તરફ, આ વિવાદ ઉગ્ર બનતાં દિલ્હી પોલીસે સત્તાવાર સ્પષ્ટતા જારી કરીને તમામ આરોપોને સખત શબ્દોમાં ફગાવી દીધા છે. નવી દિલ્હીના ડેપ્યુટી કમિશનર ઓફ પોલીસ (DCP) સચિન શર્માએ માહિતી આપતાં જણાવ્યું હતું કે, ૨૩ જૂનના રોજ જંતર-મંતર ખાતે ઘર્ષણ દરમિયાન ગાઝિયાબાદના રહેવાસી સંજય કુમાર નામના વ્યક્તિના માથામાં ઈજા પહોંચી હતી. જોકે, તબીબી તપાસ (MLC) અનુસાર આ ઈજા કોઈ ધારદાર કે જીવલેણ હથિયારથી નહીં પરંતુ મારામારી દરમિયાન કડા વાગવાથી થઈ હતી અને ડૉક્ટરોએ તેને સામાન્ય પ્રકારની ઈજા ગણાવી હતી.

​પોલીસ તંત્રે વધુમાં વિગત આપતાં ઉમેર્યું હતું કે ખોપડી ફાટી જવાની કે ગંભીર રીતે ઘાયલ થવાની વાતો માત્ર અફવા અને પાયાવિહોણી છે. આ ઘટના અંગે પાર્લામેન્ટ સ્ટ્રીટ પોલીસ સ્ટેશન ખાતે ભારતીય ન્યાય સંહિતાની સંબંધિત કલમો હેઠળ ગુનો દાખલ કરવામાં આવ્યો હતો. પોલીસે તપાસ હાથ ધરીને સ્વતંત્ર ભારદ્વાજ અને સુરજ કુમાર નામના બે આરોપીઓની અટકાયત કરી હતી અને કાયદાકીય જોગવાઈઓ મુજબ નોટિસ આપીને તેમની પૂછપરછ પણ હાથ ધરી હતી.

​દિલ્હી પોલીસે રાજકીય હસ્તક્ષેપ અથવા કોઈ નેતાના ફોન આવવાના કારણે આરોપીઓને મુક્ત કરી દેવાના તમામ દાવાઓને સરેઆમ ફગાવી દીધા છે. પોલીસના જણાવ્યા અનુસાર આ સમગ્ર મામલામાં કાયદા અને નિર્ધારિત પ્રક્રિયા મુજબ જ કાર્યવાહી કરવામાં આવી છે અને ટૂંક સમયમાં જ સક્ષમ અદાલતમાં ચાર્જશીટ પણ રજૂ કરવામાં આવશે. જોકે, પીડિત પક્ષ અને વિપક્ષી સંગઠનોએ આ મુદ્દે ઉચ્ચ સ્તરીય તપાસ અને કડક કલમો ઉમેરવાની માંગ સાથે વિરોધ પ્રદર્શન ચાલુ રાખવાની જાહેરાત કરી છે.