શિરડી:  મહારાષ્ટ્રમાં ધાર્મિક પરિવર્તનને લઈને એક પછી એક સામે આવી રહેલા કિસ્સાઓએ વહીવટીતંત્રની ઉંઘ ઉડાવી દીધી છે. નાસિકમાં TCS જેવી દિગ્ગજ આઈટી કંપનીમાં બનેલી ઘટના બાદ હવે પવિત્ર યાત્રાધામ શિરડીના ડી-માર્ટ સ્ટોરમાંથી આવો જ એક સનસનીખેજ મામલો પ્રકાશમાં આવ્યો છે. આરોપ છે કે સ્ટોરમાં કામ કરતા સોહેલ મણિયાર નામના યુવકે તેના સાથી કર્મચારી અશ્વિનનું માનસિક રીતે ‘બ્રેઈનવોશ’ કરીને તેને ધર્મ પરિવર્તન કરવા માટે મજબૂર કર્યો હતો. આ સમાચાર વાયુવેગે પ્રસરતા જ સ્થાનિક હિન્દુ સંગઠનો રસ્તા પર ઉતરી આવ્યા હતા અને સ્ટોરની બહાર ઉગ્ર વિરોધ પ્રદર્શન કરીને કડક કાર્યવાહીની માંગ કરી હતી.

આ ઘટનાની ગંભીરતાને જોતા મહારાષ્ટ્રના નાયબ મુખ્યમંત્રી દેવેન્દ્ર ફડણવીસે તાત્કાલિક ઉચ્ચ સ્તરીય બેઠક બોલાવી હતી અને પોલીસ તંત્રને કડક આદેશ આપ્યા હતા. તેમણે સ્પષ્ટ શબ્દોમાં ચેતવણી આપી છે કે ધર્મ પરિવર્તન સંબંધિત કોઈપણ પ્રવૃત્તિ કે જે બળજબરીપૂર્વક કરવામાં આવી હોય તેને રાજ્યમાં જરાપણ સહન કરવામાં આવશે નહીં. વહીવટીતંત્ર હવે એ તપાસ કરી રહ્યું છે કે શું નાસિક અને શિરડીની આ બંને ઘટનાઓ પાછળ કોઈ ખાસ ‘પેટર્ન’ કે સંગઠિત ગેંગ કામ કરી રહી છે? સુરક્ષા એજન્સીઓ હાલમાં સોહેલના સોશિયલ મીડિયા એકાઉન્ટ્સ અને કોલ ડિટેલ્સની પણ ઝીણવટભરી તપાસ કરી રહી છે.

હાલમાં શિરડી અને તેની આસપાસના વિસ્તારોમાં સ્થિતિ તણાવપૂર્ણ પરંતુ નિયંત્રણ હેઠળ છે. પોલીસે તથ્યોની ચકાસણી ન થાય ત્યાં સુધી સોશિયલ મીડિયા પર અફવાઓ ન ફેલાવવા જનતાને અપીલ કરી છે. ડી-માર્ટ વહીવટીતંત્રે પણ આ મામલે મૌન સેવ્યું છે, પરંતુ આંતરિક તપાસ શરૂ કરી હોવાના સંકેત આપ્યા છે. કોર્પોરેટ જગતમાં વધી રહેલા આવા ધાર્મિક વિવાદોને કારણે હવે મોટી કંપનીઓ તેમના કર્મચારીઓ માટે વર્કપ્લેસ પોલિસી અને એથિક્સ પર ફરીથી વિચાર કરી રહી છે. આ કેસનો રિપોર્ટ આવ્યા બાદ મહારાષ્ટ્ર સરકાર ધર્માંતરણ વિરોધી કાયદાને વધુ કડક બનાવવાની દિશામાં આગળ વધી શકે છે.