ચેન્નાઈ | તા. 05 જૂન, 2026 તમિલનાડુના રાજકારણમાં એક મોટા ધરતીકંપ સમાન ઘટનામાં, ભાજપના પૂર્વ નેતા કે. અન્નામલઈએ પક્ષમાંથી રાજીનામું આપ્યા બાદ એક નવી રાજકીય મુવમેન્ટ શરૂ કરવાની સત્તાવાર જાહેરાત કરી છે. તેમણે સ્પષ્ટ કર્યું છે કે રાજ્યમાં પરિવર્તન લાવવા માટે એક નવા રાજકીય પક્ષની જરૂરિયાત છે, જે પરંપરાગત વંશવાદ અને વ્યક્તિપૂજા (Cult politics) ની રાજનીતિને સંપૂર્ણપણે ખતમ કરી દેશે.
'સકારાત્મક પરિવર્તન' માટે નવું પ્લેટફોર્મ
સોશિયલ મીડિયા પર પોતાના સમર્થકો સાથેની વાતચીતમાં અન્નામલઈએ જણાવ્યું કે, તેમણે ભાજપમાં 'સકારાત્મક પરિવર્તન' લાવવાના હેતુથી પ્રવેશ કર્યો હતો, પરંતુ હવે સમય આવી ગયો છે કે એક નવું રાજકીય માળખું તૈયાર કરવામાં આવે. તેમણે ખુલાસો કર્યો હતો કે તેમણે 4 ડિસેમ્બર, 2025 ના રોજ જ પક્ષને પોતાના રાજીનામા વિશે જાણ કરી દીધી હતી, પરંતુ પક્ષના આદેશ પર તેઓ ચૂંટણી પૂર્ણ થાય ત્યાં સુધી પક્ષ સાથે જોડાયેલા રહ્યા.
રાજકીય સંસ્કૃતિ બદલવાનો નિર્ધાર
અન્નામલઈએ પોતાની નવી મુવમેન્ટનું નામ "વી ધ લીડર" (We the Leader) રાખ્યું છે. તેમણે કહ્યું, "આપણે રાજ્યના વિકાસ માટે ઉપલબ્ધ તમામ પ્રતિભાઓનો ઉપયોગ કરવો જોઈએ. આ માટે આપણે આપણી રાજકીય વ્યાકરણ અને સંસ્કૃતિ બદલવી પડશે. હવે કોઈ કાયમી ધારાસભ્ય, સાંસદ કે મંત્રી નથી – જેમાં હું પણ સામેલ છું. આ જ અમારા આંદોલનનું મુખ્ય સૂત્ર રહેશે." તેમણે ટેકનોક્રેટ્સ અને સમાજના તમામ વર્ગના લોકોને આ મુવમેન્ટમાં જોડાવા માટે આહવાન કર્યું છે.
કોઈમ્બતુરથી કાર્યરત થશે કેન્દ્ર
આ મુવમેન્ટ હેઠળ 'એપીજે અબ્દુલ કલામ સેન્ટર ફોર એથિક્સ એન્ડ પોલિટિક્સ' નામની સંસ્થા કોઈમ્બતુર ખાતે કાર્યરત રહેશે, જે પ્લેટફોર્મ માટે એક સુવિધા કેન્દ્ર તરીકે કામ કરશે. અન્નામલઈએ દાવો કર્યો છે કે તેમના એલાન બાદ ટૂંકા સમયમાં જ 47,000 થી વધુ લોકો આ મુવમેન્ટમાં જોડાઈ ગયા છે. ભાજપના પ્રમુખ નિતિન નબીને પણ તેમનું રાજીનામું સ્વીકારી લીધું છે, જેનાથી તમિલનાડુના આગામી રાજકીય સમીકરણોમાં મોટો વળાંક આવવાની શક્યતાઓ સર્જાઈ છે.