નવી દિલ્હી:આસામના મુખ્યમંત્રી હિમંત બિસ્વા સરમાના પત્ની રિંકી ભુઈયા સરમા પર કરવામાં આવેલી કથિત ટિપ્પણીના મામલામાં કોંગ્રેસના વરિષ્ઠ નેતા પવન ખેડાને સુપ્રીમ કોર્ટ તરફથી મોટી રાહત મળી છે. સર્વોચ્ચ અદાલતે ખેડાની અગ્રીમ જામીન અરજી સ્વીકારી લેતા ધરપકડ સામે રક્ષણ આપ્યું છે. આ ચુકાદા બાદ દિલ્હી એરપોર્ટ પહોંચેલા પવન ખેડાનું કોંગ્રેસ કાર્યકરોએ ઉત્સાહભેર સ્વાગત કર્યું હતું.

ન્યાયતંત્ર અને બંધારણ પર અતૂટ ભરોસો

એરપોર્ટ પર પત્રકારો સાથે વાતચીત કરતા પવન ખેડાએ જણાવ્યું હતું કે, "બાબા સાહેબ આંબેડકર દ્વારા બનાવવામાં આવેલું આપણું બંધારણ દરેક એ વ્યક્તિની મદદ કરે છે જે મુશ્કેલીમાં છે અથવા કોઈ દમનકારી સરકાર સામે લડી રહી છે. મને સુપ્રીમ કોર્ટમાંથી જે રાહત મળી છે તે આ બંધારણને કારણે જ શક્ય બની છે." તેમણે ન્યાયતંત્રમાં પોતાનો અતૂટ વિશ્વાસ વ્યક્ત કર્યો હતો.

સુપ્રીમ કોર્ટે હાઈકોર્ટનો નિર્ણય પલટાવ્યો

જસ્ટિસ જે.કે. માહેશ્વરી અને જસ્ટિસ અતુલ એસ. ચાંદુરકરની બેન્ચે ગુવાહાટી હાઈકોર્ટના તે આદેશને રદ કર્યો હતો જેમાં ખેડાને ધરપકડમાંથી સુરક્ષા આપવાનો ઇનકાર કરાયો હતો. સુપ્રીમ કોર્ટે સ્પષ્ટ કર્યું હતું કે તપાસ ભલે ચાલુ રહે, પરંતુ બંધારણની કલમ 21 હેઠળ મળતી વ્યક્તિગત સ્વતંત્રતાને હળવાશથી ન લઈ શકાય. અદાલતે નિર્દેશ આપ્યો હતો કે જો ખેડાની ધરપકડ કરવામાં આવે, તો તેમને તાત્કાલિક અગ્રીમ જામીન પર મુક્ત કરવામાં આવે. જોકે, તેમને તપાસમાં સંપૂર્ણ સહકાર આપવા અને કોર્ટની મંજૂરી વિના દેશ ન છોડવા તાકીદ કરી છે.

કોંગ્રેસે ગણાવી 'ન્યાયની જીત'

કોંગ્રેસ પક્ષે આ નિર્ણયને લોકશાહીની જીત ગણાવી આવકાર્યો છે. જયરામ રમેશ અને અભિષેક મનુ સિંઘવીએ પત્રકાર પરિષદમાં ભારપૂર્વક જણાવ્યું હતું કે ધરપકડ એ રૂટિન પ્રક્રિયા નહીં પરંતુ અંતિમ વિકલ્પ હોવો જોઈએ, ખાસ કરીને માનહાનિ જેવા કેસોમાં. કોંગ્રેસે ઉમેર્યું હતું કે આ ચુકાદો એવા લોકો માટે બોધપાઠ છે જેઓ રાજકીય હિસાબ બરાબર કરવા ધરપકડને હથિયાર તરીકે વાપરે છે. જયરામ રમેશે ટિપ્પણી કરી હતી કે સુપ્રીમ કોર્ટના આ આદેશથી ફરી સાબિત થયું છે કે દેશમાં હજુ ન્યાયની જ્યોત પ્રજ્વલિત છે.