નવીદિલ્હી: વડાપ્રધાન નરેન્દ્રભાઈ મોદી ઇટાલી, નોર્વે, સંયુક્ત આરબ અમીરાત સહિત કુલ પાંચ દેશોની અત્યંત મહત્વપૂર્ણ અને સફળ રાજદ્વારી મુલાકાત પૂર્ણ કરીને સ્વદેશ પરત ફર્યા છે. દેશમાં પરત ફરતાની સાથે જ તેમણે આજે રાજધાની નવી દિલ્હી ખાતે કેન્દ્રીય કેબિનેટની એક ઉચ્ચ સ્તરીય બેઠકનું આયોજન કર્યું છે. આ બેઠકને લઈને રાજકીય વર્તુળોમાં અનેક પ્રકારની ચર્ચાઓ જાગી છે કારણ કે તેમાં ભવિષ્યના કેબિનેટ વિસ્તરણ અને ફેરબદલ અંગે મોટા નિર્ણયો લેવામાં આવી શકે છે. સરકારના વિવિધ મંત્રાલયો અને વિભાગો દ્વારા કરવામાં આવી રહેલા કાર્યોની ઝીણવટભરી સમીક્ષા આ બેઠકનો મુખ્ય હેતુ છે.

આ ઉપરાંત, કેન્દ્ર સરકાર દ્વારા તાજેતરના સમયમાં લેવામાં આવેલા વિવિધ નિર્ણયો, યોજનાઓ અને નીતિઓની સામાન્ય જનતા પર શું અસર પડી છે તેનું ગહન આકલન પણ આ બેઠકમાં કરવામાં આવશે. 

બેઠકની ગંભીરતાને ધ્યાનમાં રાખીને તમામ કેન્દ્રીય પ્રધાનો અને રાજ્ય કક્ષાના મંત્રીઓને આજે દિલ્હીમાં જ ફરજિયાતપણે રોકાવા માટે સ્પષ્ટ અને કડક સૂચના આપવામાં આવી છે. આગામી સમયના રાજકીય કાર્યક્રમો અને વહીવટી પારદર્શિતાને વધુ સુદઢ બનાવવા માટે આ બેઠક અત્યંત નિર્ણાયક સાબિત થશે તેવું રાજકીય નિષ્ણાતો માની રહ્યા છે. 

કેટલાક મંત્રીઓના ખાતા બદલાય અથવા નવા ચહેરાઓને સ્થાન મળે તેવી પણ પૂરી સંભાવનાઓ સત્તાવાર વર્તુળોમાં વ્યક્ત કરવામાં આવી રહી છે. *