નવી દિલ્હી :  એશિયાના અગ્રણી ઉદ્યોગપતિઓ મુકેશ અંબાણી અને ગૌતમ અદાણી બાદ હવે ટાટા ગ્રુપે પણ AI ડેટા સેન્ટર ક્ષેત્રે મોટો દાવ ખેલ્યો છે. ટાટા કન્સલ્ટન્સી સર્વિસીસની ડેટા સેન્ટર પેટાકંપની 'હાઇપરવોલ્ટ' દ્વારા હૈદરાબાદમાં ૨૬૪ એકર જમીન પર ૧ ગીગાવોટ  ક્ષમતા ધરાવતું વિશાળ AI ડેટા સેન્ટર કેમ્પસ સ્થાપવાની જાહેરાત કરવામાં આવી છે. હાઇપરવોલ્ટ અને તેના સહયોગી ભાગીદારો તબક્કાવાર રીતે આ અત્યાધુનિક ઇન્ફ્રાસ્ટ્રક્ચર ઊભું કરવા અને તેના સંચાલન માટે ₹૭૦,૦૦૦ કરોડ સુધીનું જંગી રોકાણ કરશે.

આ સમર્પિત કેમ્પસ ખાસ કરીને વૈશ્વિક AI કંપનીઓ અને હાઇપરસ્કેલર્સની વધતી જરૂરિયાતો પૂરી કરવા માટે ડિઝાઇન કરવામાં આવ્યું છે. તે હાઇ-ડેન્સિટી ગ્રાફિક્સ પ્રોસેસિંગ યુનિટ (GPU) ડિપ્લોયમેન્ટ, લિક્વિડ કૂલિંગ અને મોટા પાવર બ્લોક્સથી સજ્જ હશે, જે AI ટ્રેનિંગ અને એડવાન્સ્ડ કમ્પ્યુટિંગ કાર્યોને ઝડપી બનાવશે. પૂરેપૂરી ક્ષમતા સાથે કાર્યરત થયા બાદ આ કેમ્પસ ભારતનું સૌથી મોટું અને ટેકનોલોજીની દ્રષ્ટિએ સૌથી અદ્યતન AI કેન્દ્ર બનશે. આ પ્રોજેક્ટ ગ્રીન એનર્જી અને વોટર-ન્યુટ્રલ મોડેલ પર આધારિત હશે, જેનાથી સ્થાનિક સ્તરે પાવર, કૂલિંગ, નેટવર્કિંગ અને એન્જિનિયરિંગ ક્ષેત્રે હજારો પ્રત્યક્ષ અને પરોક્ષ રોજગારીની તકો ઊભી થશે.

હાઇપરવોલ્ટના સીઈઓ અને એમડી દીપેશ કિરણ નંદાના જણાવ્યા મુજબ, હૈદરાબાદ ફ્રન્ટિયર AI કંપનીઓને મોટા પાયે સેવાઓ પૂરી પાડવા માટે આદર્શ સ્થળ છે. અગાઉ TCS દ્વારા જાહેરાત કરવામાં આવી હતી કે તે વૈશ્વિક એસેટ મેનેજમેન્ટ કંપની TPG સાથે મળીને આ વ્યવસાયમાં $૨ બિલિયન (અંદાજે ₹૧૮,૦૦૦ કરોડ)નું ભંડોળ રોકશે, જેનો ઉપયોગ આ તબક્કાવાર વિકાસમાં કરવામાં આવશે.