કાબુલ, તા. ૭ : અફઘાનિસ્તાનમાં સોમવારે વહેલી સવારે રિક્ટર માપક ઉપર ૪.૧ની તીવ્રતાનો ભૂકંપ નોંધાયો હતો. ભૂકંપનું કેન્દ્ર જમીનથી આશરે ૧૩૦ કિલોમીટર ઊંડાઈએ હોવાથી સપાટી ઉપર તેની અસર મર્યાદિત રહી હોવાનું પ્રાથમિક રીતે જાણવા મળ્યું છે.

આંચકા બાદ જાનમાલને નુકસાન થયું હોવાના કોઈ તાત્કાલિક સત્તાવાર અહેવાલ મળ્યા નથી. ઊંડાઈમાં સર્જાતા ભૂકંપ સામાન્ય રીતે વિશાળ વિસ્તારમાં અનુભવાઈ શકે છે, પરંતુ સપાટી નજીક આવતા તેની વિનાશક અસર ઘણી વખત ઓછી થઈ જાય છે.

અફઘાનિસ્તાનનો હિન્દુકુશ વિસ્તાર ભારતીય અને યુરેશિયન ભૂપૃષ્ઠીય પટ્ટીઓના અથડામણ ક્ષેત્રમાં આવેલો હોવાથી અહીં વારંવાર ભૂકંપ આવે છે. અગાઉના વિનાશક ભૂકંપોથી ભારે નુકસાન ભોગવી ચૂકેલા દેશમાં સત્તાવાળાઓએ પરિસ્થિતિ ઉપર નજર રાખી છે.