સિલીગુડી : ભારતની ભૌગોલિક અને વ્યુહાત્મક સુરક્ષા માટે અત્યંત મહત્વપૂર્ણ ગણાતા પૂર્વોત્તર ભારતના પ્રવેશદ્વાર એટલે કે 'ચિકન નેક' (સિલીગુડી કોરિડોર) ની સુરક્ષા વ્યવસ્થાને લઈને કેન્દ્ર સરકાર એક્શન મોડમાં આવી ગઈ છે. કેન્દ્રીય ગૃહ અને સહકાર મંત્રી અમિતભાઈ શાહે આજે પશ્ચિમ બંગાળના સિલીગુડીમાં આવેલા 'ઉત્તરકન્યા' ખાતે એક હાઈ-પાવર બેઠકની અધ્યક્ષતા કરી હતી. આ બેઠકમાં દેશની આંતરરાષ્ટ્રીય સરહદોની સુરક્ષા, કાયદો અને વ્યવસ્થાની સ્થિતિ તેમજ દેશમાં તાજેતરમાં જ લાગુ કરાયેલા નવા ફોજદારી કાયદાઓના અમલીકરણ અંગે અત્યંત ગંભીર ચર્ચા-વિચારણા કરવામાં આવી હતી.

સરહદી સુરક્ષા અને વહીવટી તંત્રના વડાઓ સાથે મેગા મંથન:

આ હાઈ-લેવલ બેઠકની ગંભીરતાનો અંદાજ એ વાત પરથી લગાવી શકાય છે કે તેમાં પશ્ચિમ બંગાળના મુખ્યમંત્રી સુવેન્દુ અધિકારી, ઉત્તર બંગાળના તમામ જિલ્લાના મેજિસ્ટ્રેટ્સ (DM), પોલીસ અધિક્ષકો (SP) અને બોર્ડર સિક્યોરિટી ફોર્સ (BSF) ના ઉચ્ચ સનદી અધિકારીઓએ ખાસ હાજરી આપી હતી. બેઠકમાં રાષ્ટ્રીય સુરક્ષા સાથે જોડાયેલા સંવેદનશીલ મુદ્દાઓ ઉપરાંત ડિજિટલ ગવર્નન્સના ભાગરૂપે જન્મ અને મૃત્યુની સચોટ નોંધણી પ્રક્રિયાને વધુ સુદ્રઢ બનાવવા પર પણ વિસ્તૃત ચર્ચા કરવામાં આવી હતી.

સરહદ પર જઈને BSF જવાનોનો ઉત્સાહ વધાર્યો:

આ સત્તાવાર બેઠકો પૂર્વે, ગૃહમંત્રી અમિતભાઈ શાહે સિલીગુડી નજીક આવેલા જુમાગચ્છ BSF કેમ્પની મુલાકાત લીધી હતી. ત્યાં તેમણે આયોજિત 'પ્રહરી સંમેલન' માં ભાગ લઈને દેશની સરહદોની રાત-દિવસ રક્ષા કરતા સીમા સુરક્ષા દળના જાંબાઝ જવાનો સાથે સીધો સંવાદ કર્યો હતો અને ઉત્તર બંગાળના સરહદી વિસ્તારોની વર્તમાન સ્થિતિની સઘન સમીક્ષા કરી હતી. દેશભક્તિના માહોલ વચ્ચે શ્રી શાહે કેમ્પ પરિસરમાં વૃક્ષારોપણ કર્યું હતું અને સીમા સુરક્ષાને મજબૂત કરતા અનેક મહત્વકાંક્ષી પ્રોજેક્ટ્સનો શિલાન્યાસ પણ કર્યો હતો.

કોલકાતામાં કાયદો-વ્યવસ્થાની બેઠક અને અમૂલના મેગા પ્રોજેક્ટનું ખાતમુહૂર્ત:

ગૃહમંત્રીના પશ્ચિમ બંગાળ પ્રવાસની હલચલ અહીં જ પૂરી થતી નથી. સિલીગુડીની બેઠકો બાદ તેઓ સીધા કોલકાતા જવા રવાના થયા છે, જ્યાં તેઓ રાજ્યની વર્તમાન કાયદો અને વ્યવસ્થાની સ્થિતિ અંગે વધુ એક હાઈ-લેવલ બેઠક યોજશે. ત્યારબાદ આગામી દિવસે કોલકાતાની ઐતિહાસિક રાષ્ટ્રીય પુસ્તકાલયમાં તૈયાર કરાયેલા ભવ્ય 'વર્ડ મ્યુઝિયમ' નું ઉદ્ઘાટન તેમના હસ્તે કરવામાં આવશે.

સાથોસાથ, રવિવારે બપોરે તેઓ બિસ્વા બાંગ્લા કન્વેન્શન સેન્ટર ખાતે આયોજિત એક ભવ્ય સમારોહ દરમિયાન હાવડા જિલ્લાના સંકરેલ ફૂડ પાર્ક ખાતે નિર્માણ પામનાર 'અમૂલ ડેરી' ની વિશ્વની સૌથી મોટી અત્યાધુનિક દહીં બનાવવાની ફેક્ટરીનું ડિજિટલ ખાતમુહૂર્ત કરશે. ગૃહમંત્રીના આ પ્રવાસથી બંગાળની સુરક્ષા અને વિકાસ બંને મોરચે મોટી હલચલ જોવા મળી રહી છે.