ચેન્નાઈ : દેશભરમાં NEET-UG ૨૦૨૬ ની પરીક્ષા કથિત પેપર લીકના વિવાદોને કારણે રદ થતા લાખો વિદ્યાર્થીઓ અને વાલીઓમાં ભારે રોષ છે. આ પરિસ્થિતિ વચ્ચે તમિલનાડુના મુખ્યમંત્રી એસ. જોસેફ વિજયે ફરી એકવાર NEET વિરુદ્ધ રણશિંગુ ફૂંક્યું છે. તેમણે કેન્દ્ર સરકારને પત્ર લખીને અને જાહેર નિવેદન આપીને મેડિકલ પ્રવેશ માટેની આ કેન્દ્રીય પરીક્ષાને કાયમી ધોરણે નાબૂદ કરવાની અને રાજ્યોને ફરીથી જૂની પદ્ધતિ મુજબ ધોરણ-૧૨ (ઉચ્ચતર માધ્યમિક) ના ગુણના આધારે MBBS અને BDS માં પ્રવેશ આપવાની સત્તા સોંપવાની માંગ કરી છે.

'NEET એટલે ગરીબ વિદ્યાર્થીઓ સાથે અન્યાય'

તમિલનાડુ સરકારે એક સત્તાવાર પ્રેસ રિલીઝમાં દલીલ કરી છે કે NEET જેવી રાષ્ટ્રીય કક્ષાની પરીક્ષાઓ ગ્રામીણ પૃષ્ઠભૂમિ, સરકારી શાળાઓ અને તમિલ માધ્યમમાં ભણતા વિદ્યાર્થીઓ માટે અવરોધ સમાન છે. મુખ્યમંત્રીએ ભારપૂર્વક જણાવ્યું કે આ પરીક્ષા પ્રણાલી માત્ર એવા વિદ્યાર્થીઓને જ લાભ આપે છે જેઓ મોંઘા કોચિંગ ક્લાસ અને શહેરી સંસાધનોનો ઉપયોગ કરી શકે છે. આર્થિક રીતે નબળા વર્ગના તેજસ્વી વિદ્યાર્થીઓ આ રેસમાં પાછળ રહી જાય છે, જે સામાજિક ન્યાયના સિદ્ધાંતની વિરુદ્ધ છે.

પેપર લીક વિવાદે વિશ્વસનીયતા પર ઉઠાવ્યા સવાલ

તાજેતરના વર્ષોમાં NEET ની પરીક્ષાઓમાં વારંવાર સામે આવતા પેપર લીકના કૌભાંડો અને ગેરરીતિઓએ રાષ્ટ્રીય પરીક્ષા એજન્સી (NTA) ની વિશ્વસનીયતા પર મોટા પ્રશ્નાર્થ ચિહ્નો ઉભા કર્યા છે. વર્ષ ૨૦૨૬ માં ૨૨ લાખથી વધુ ઉમેદવારો, જેમાં તમિલનાડુના ૧.૪ લાખ વિદ્યાર્થીઓ સામેલ છે, તેઓ અત્યારે અનિશ્ચિતતાના માહોલમાં જીવી રહ્યા છે. CM વિજયે આ બાબતને અત્યંત ચિંતાજનક ગણાવતા કહ્યું કે આ વિવાદોએ સાબિત કરી દીધું છે કે કેન્દ્રીયકૃત પ્રણાલીમાં મોટી ખામીઓ છે.

રાજ્યની સ્વાયત્તતા પુનઃસ્થાપિત કરવાની માંગ

તમિલનાડુ લાંબા સમયથી NEET નો વિરોધ કરતું રહ્યું છે. હવે ફરીથી રાજ્ય સરકારે માંગ કરી છે કે MBBS, BDS અને આયુષ જેવા તબીબી અભ્યાસક્રમોમાં બેઠકો ભરવાની સંપૂર્ણ સ્વાયત્તતા રાજ્યોને હોવી જોઈએ. જો કેન્દ્ર સરકાર આ માંગ સ્વીકારે તો તમિલનાડુ સરકાર ધોરણ-૧૨ ના પરિણામોના મેરિટના આધારે જ એડમિશન પ્રક્રિયા શરૂ કરવા તૈયાર છે. હવે જોવાનું એ રહેશે કે પેપર લીકના વિવાદો વચ્ચે કેન્દ્ર સરકાર આ મામલે કેવું વલણ અપનાવે છે, કારણ કે આ મુદ્દો હવે માત્ર શિક્ષણનો જ નહીં પણ મોટો રાજકીય મુદ્દો પણ બની ગયો છે.