નવી દિલ્હી | તા.૦૩: અમેરિકાની યુનિવર્સિટીમાંથી મેળવેલી પોતાની ડિગ્રીને લઈને વિવાદોમાં ઘેરાયેલા કોકરોચ જનતા પાર્ટી (CJP) ના સ્થાપક અભિજીત દીપકે આખરે મૌન તોડ્યું છે. તેમણે પોતાની શૈક્ષણિક લાયકાતનો પુરાવો સાર્વજનિક કરવાની તૈયારી દર્શાવી છે, પરંતુ સાથે જ દેશના વડાપ્રધાન નરેન્દ્ર મોદીનું નામ લઈને એક નવી શરત મૂકી દેતાં રાજકીય વર્તુળોમાં ભારે ચર્ચા જાગી છે.

સોશિયલ મીડિયા પ્લેટફોર્મ X (અગાઉનું ટ્વિટર) પર એક વિગતો આપતી પોસ્ટમાં અભિજીત દીપકે લખ્યું કે, "લોકો મારી ડિગ્રી જોવાની આતુરતામાં પોતાની ધીરજ ગુમાવી રહ્યા છે. મને આશ્ચર્ય થાય છે કે આ જ લોકો છેલ્લા ૧૨ વર્ષથી વડાપ્રધાનની ડિગ્રી જોયા વિના કેવી રીતે ટકી રહ્યા છે?" આ સાથે જ તેમણે પીએમ મોદીને સીધું આમંત્રણ આપતાં ઉમેર્યું હતું કે, "ચાલો આપણે બંને એકસાથે આપણી ડિગ્રીઓ જાહેર કરીએ અને આ વિવાદનો કાયમી અંત લાવીએ."

આ વિવાદની શરૂઆત તાજેતરમાં પ્રખર ગુપ્તાના પોડકાસ્ટમાં થઈ હતી, જ્યાં જાણીતા સામાજિક કાર્યકર્તા સોનમ વાંગચુકે અભિજીત દીપકના અમેરિકન શિક્ષણ અને બોસ્ટન યુનિવર્સિટીની ડિગ્રી પર ખુલ્લેઆમ સવાલો ઉઠાવ્યા હતા. નોંધનીય છે કે પીએમ મોદીની શૈક્ષણિક લાયકાત અંગે ભાજપ અગાઉ પણ સ્પષ્ટતા કરી ચૂક્યું છે અને પાર્ટીનો દાવો છે કે આ મુદ્દો ક્યારનોય ઉકેલાઈ ગયો છે.

બીજી તરફ, CJP એ આગામી ૫ સપ્ટેમ્બરે યોજાનારી પોતાની વિરોધ કૂચ રદ કરવાની જાહેરાત કરી છે. NEET પેપર લીક વિરોધ પ્રદર્શનમાં સામેલ વિદ્યાર્થીઓ સામેની તમામ FIR રદ કરવાના અને સુપ્રીમ કોર્ટ દ્વારા પીડિત પરિવારોને વળતર આપવાના ઐતિહાસિક આદેશને દીપકે "સંપૂર્ણ ન્યાય" ગણાવી આવકાર્યો છે.