નવી દિલ્હી (ન્યૂઝફર્સ્ટ) : અમેરિકી સૈન્ય દળોએ ઈરાનમાં આવેલા બહુવિધ લક્ષ્યાંકો પર આક્રમક આત્મરક્ષણાત્મક પ્રહારો શરૂ કરી દેતા બંને દેશો વચ્ચે યુદ્ધ ફાટી નીકળ્યું છે. પેન્ટાગોન ચીફે આ અંગે સત્તાવાર નિવેદન આપતા જણાવ્યું છે કે ઈરાન પર કરવામાં આવી રહેલા સૈન્ય હુમલા અત્યંત મજબૂત અને સ્પષ્ટ હશે. અમેરિકાના લડાકુ વિમાનો હાલ ઈરાનના આકાશમાં સતત ઘૂમી રહ્યા છે અને આ એરસ્ટ્રાઈકની નવી લહેરમાં તેહરાન, કરજ, બંદર કંગન અને વરામીન જેવા શહેરોને નિશાન બનાવવામાં આવ્યા છે. ઈરાનની રાજધાની તેહરાનમાં ભયાનક વિસ્ફોટોના અવાજ સંભળાતા જ ઈરાન દ્વારા તેની એર ડિફેન્સ સિસ્ટમને સક્રિય કરી દેવામાં આવી છે.

આ ભીષણ હુમલાઓ વચ્ચે ઈરાનના બંદર અબ્બાસ, કિશ આઇલેન્ડ, કેશમ અને હેંગામ વિસ્તારમાં પણ એક પછી એક અનેક વિસ્ફોટોના અવાજ સંભળાયા છે. બંદર અબ્બાસમાં એરપોર્ટ અને મિલિટરી એરબેઝની નજીક જોરદાર બોમ્બ બ્લાસ્ટ થયા હોવાના અહેવાલો સાંપડ્યા છે. ઈરાની મીડિયાના જણાવ્યા અનુસાર, સમુદ્રમાં અમેરિકા અને ઈરાનના સૈન્ય દળો વચ્ચે સીધી સૈન્ય અથડામણો શરૂ થઈ ચૂકી છે, જેમાં હોર્મુઝની સામુદ્રધુની (Strait of Hormuz) નજીક તૈનાત અમેરિકી નૌકાદળના જહાજોને ઈરાન દ્વારા મિસાઈલ અને ડ્રોન વડે ટાર્ગેટ કરવામાં આવ્યા છે. ભારે તણાવની આ પરિસ્થિતિ વચ્ચે ઈરાને વૈશ્વિક સ્તરે હોર્મુઝની સામુદ્રધુનીમાંથી કોઈપણ વહાણોની અવરજવર માટે પેસેજ સંપૂર્ણપણે બંધ કરવાની જાહેરાત કરી દીધી છે.

બીજી તરફ, અમેરિકાના આ પ્રચંડ હુમલાના જવાબમાં ઈરાની સેનાએ પણ બહેરીનમાં આવેલા અમેરિકાના ફિફ્થ ફ્લીટ (પાંચમા નૌકા સૈન્ય બેઝ) પર જોરદાર વળતો હુમલો કર્યો છે. ઈરાની ડ્રોન દ્વારા બહેરીનમાં સૈન્ય લક્ષ્યાંકો પર કરવામાં આવેલા આ હુમલાને પગલે ત્યાંના સ્થાનિક લોકોએ એક પછી એક અનેક મોટા વિસ્ફોટો થયા હોવાની પુષ્ટિ કરી છે. આ વૈશ્વિક સૈન્ય સંકટ અને તણાવ વચ્ચે સંયુક્ત રાષ્ટ્ર (UN) ખાતેના ઈરાનના રાજદૂતે સ્પષ્ટ અને કડક શબ્દોમાં જણાવ્યું છે કે, ઈરાને ક્યારેય કોઈની ધમકીઓ હેઠળ આવીને વાટાઘાટો કરી નથી અને ઈરાન કોઈપણ પ્રકારના દબાણ કે બળજબરી સામે ક્યારેય નમશે નહીં.