ન્યૂયોર્ક, તા. ૨૭ : અમેરિકાના પૂર્વ કાંઠે ત્રાટકેલા શક્તિશાળી ઉત્તરપૂર્વીય દરિયાઈ તોફાનને કારણે ન્યૂયોર્ક, ન્યૂજર્સી, કનેક્ટિકટ, મેસેચ્યુસેટ્સ, રોડ આઇલેન્ડ અને પેન્સિલ્વેનિયામાં ભારે વરસાદ, તોફાની પવન તથા પૂરની સ્થિતિ સર્જાઈ છે. શનિવારે એક સમયે એક લાખથી વધુ ઘર અને વેપારી એકમોનો વીજપુરવઠો ખોરવાયો હતો.

રાત્રે પણ આશરે ૭૩ હજાર વીજગ્રાહકો અંધારપટ હેઠળ રહ્યા હતા. ન્યૂયોર્ક અને કનેક્ટિકટમાં વીસ-વીસ હજારથી વધુ વીજજોડાણો બંધ નોંધાયા હતા. ન્યૂજર્સીના ઉત્તર ભાગથી કેપ મે સુધી અનેક વિસ્તારોમાં પાણી ભરાતાં કેટલાક દરિયાકાંઠાના રહેવાસીઓને સ્વૈચ્છિક સ્થળાંતર કરવાની સૂચના આપવામાં આવી હતી.

હવાઈ વ્યવહાર ઉપર પણ ગંભીર અસર પડી હતી. શનિવાર રાત્રિ સુધી અમેરિકાનાં વિમાનમથકો સાથે સંકળાયેલી ૪૪૫ ઉડાનો રદ અને ૩,૦૧૬ ઉડાનો વિલંબિત થઈ હતી. ન્યૂયોર્ક અને ન્યૂજર્સીના અસરગ્રસ્ત વિસ્તારોમાં કટોકટી જાહેર કરવામાં આવી છે. સત્તાવાર આગાહી અનુસાર મધ્ય એટલાન્ટિક અને ન્યૂ ઇંગ્લેન્ડ વિસ્તારમાં સોમવાર સુધી દરિયાઈ પૂર, ભારે વરસાદ, ઊંચાં મોજાં અને તોફાની પવનનું જોખમ રહી શકે છે.