દિલ્હી : દિલ્હી-દહેરાદુન એક્સપ્રેસ વે પર શકરપુર વિસ્તારમાં બુધવારે સાંજે એક મોટી દુર્ઘટના ટળી ગઈ હતી, જ્યારે ચાલુ અર્ટિગા કારમાં અચાનક આગ લાગી હતી. નોઈડાના છાપરૌલી વિસ્તારમાં રહેતા રામકુમાર પોતાના પરિવાર સાથે તહેવાર ઉજવીને બાગપતથી ઘરે પરત ફરી રહ્યા હતા, ત્યારે સાંજે આશરે 7 વાગ્યે કારના એન્જિનમાંથી અચાનક ધુમાડો નીકળવા લાગ્યો હતો. થોડી જ ક્ષણોમાં આગે વિકરાળ સ્વરૂપ ધારણ કરી લીધું હતું, જેને જોઈને કારમાં સવાર ડ્રાઈવર સહિત તમામ લોકો ગભરાઈ ગયા હતા.

આ ભયાનક સ્થિતિમાં ડ્રાઈવર રામકુમારે અસાધારણ સમજદારી દાખવીને તાત્કાલિક કાર રોકી દીધી હતી અને બે નાના બાળકો અને પત્ની સહિત પાંચેય સભ્યોએ સમયસૂચકતા વાપરીને કારમાંથી બહાર કૂદીને પોતાનો સુરક્ષિત બચાવ કર્યો હતો. પરિવારના જણાવ્યા અનુસાર, જો તેઓ બહાર નીકળવામાં થોડી પણ મોડા પડ્યા હોત તો મોટો જાનહાનિ સર્જાઈ શકી હોત, કારણ કે થોડી જ મિનિટોમાં આખી કાર આગની લપેટમાં આવી ગઈ હતી અને બળીને સંપૂર્ણપણે ખાખ થઈ ગઈ હતી.

ઘટનાની જાણ થતા જ ફાયર વિભાગની ટીમ તાત્કાલિક ઘટનાસ્થળે દોડી આવી હતી અને ભારે જહેમત બાદ અડધા કલાકમાં આગ પર સંપૂર્ણ કાબુ મેળવ્યો હતો. અચાનક ફાટી નીકળેલી આ આગ અને વાહન માર્ગ પર અટકી જવાને કારણે દિલ્હી-દહેરાદુન એક્સપ્રેસ વે પર ભારે ટ્રાફિકજામ સર્જાયો હતો અને લાંબી વાહનોની કતારો લાગી ગઈ હતી, જેના લીધે આવનજવર કરતા અન્ય વાહનચાલકોને પણ ભારે મુશ્કેલીનો સામનો કરવો પડ્યો હતો.

પ્રાથમિક તપાસમાં ડ્રાઈવર રામકુમારે કારમાં થયેલા શોર્ટ સર્કિટને કારણે જ આ આગ લાગી હોવાની પ્રબળ શંકા વ્યક્ત કરી છે. આ બનાવ બાદ વાહનોની ટેક્નિકલ ફિટનેસ અને વાયરીંગની ચકાસણી બાબતે ફરી એકવાર ગંભીર સવાલો ઊભા થયા છે, ત્યારે આગામી સમયમાં ટ્રાફિક પોલીસ અને ફાયર વિભાગ દ્વારા આ દુર્ઘટનાના ચોક્કસ કારણોની ઊંડાણપૂર્વક તપાસ હાથ ધરવામાં આવશે અને જરૂરી સલામતી પગલાં અંગે સમીક્ષા કરવામાં આવશે.