ચેન્નઈ, તા.૦૨: તમિલનાડુના મુખ્યમંત્રી સી. જોસેફ વિજયે બુધવારે રાજ્ય વિધાનસભામાં એક અત્યંત મહત્વપૂર્ણ અને ઐતિહાસિક જાહેરાત કરી છે. તેમની સરકારે અગાઉની એમ.કે. સ્ટાલિનની આગેવાની હેઠળની DMK સરકારના કાર્યકાળ દરમિયાન પોતાની આજીવિકા અને હકની માંગણીઓ માટે વિરોધ પ્રદર્શન કરનારા ખેડૂતો અને શિક્ષકો સામે નોંધાયેલા તમામ ગુનાહિત કેસો પાછા ખેંચવાનો મોટો નિર્ણય લીધો છે.

વિધાનસભામાં નિયમ ૧૧૦ હેઠળ સ્વતઃ નિવેદન આપતા મુખ્યમંત્રી વિજયે જણાવ્યું હતું કે, ખેડૂતો તમિલનાડુની "કરોડરજ્જુ" છે. તિરુવન્નામલાઈ સહિતના વિસ્તારોમાં SIPCOT ઔદ્યોગિક પ્રોજેક્ટ્સ અને પરંદુર એરપોર્ટ સામે આંદોલન કરનારા નિર્દોષ ખેડૂતો પર ભૂતકાળમાં કડક 'ગુંડા એક્ટ' જેવી કલમો પણ લગાવી દેવામાં આવી હતી. વિજય સરકારે આ ખેતીની જમીનો બચાવવા માટે પરંદુર એરપોર્ટ પ્રસ્તાવને પહેલાથી જ રદ કરી દીધો છે અને હવે ખેડૂતો સામેના કેસો રદ કરીને તેમને મોટી રાહત આપી છે.

શિક્ષકો સામેના કેસો પણ રદ, વિપક્ષોએ નિર્ણયને બિરદાવ્યો

ખેડૂતો ઉપરાંત પોતાની વાજબી માંગણીઓ માટે લોકશાહી ઢબે આંદોલન કરનારા શિક્ષકો સામેના પેન્ડિંગ કેસો પણ સંપૂર્ણપણે પાછા ખેંચવામાં આવશે. મુખ્યમંત્રીએ અગાઉની DMK સરકારની કડક ટીકા કરતા આરોપ લગાવ્યો હતો કે ભૂતપૂર્વ વહીવટમાં વિરોધ કરનારાઓ સાથે "અમાનવીય" વર્તન કરવામાં આવ્યું હતું. તેમણે ઉમેર્યું કે આ પગલાથી રાજ્યમાં લોકશાહી અધિકારો મજબૂત થશે અને પ્રજાનો સરકાર પરનો વિશ્વાસ પુનઃસ્થાપિત થશે.

મુખ્યમંત્રીના આ નિર્ણયનું ચોમેરથી સ્વાગત થઈ રહ્યું છે. આ જાહેરાત બાદ CPI અને PMK જેવા વિપક્ષી પક્ષોએ પણ સરકારના નિર્ણયને બિરદાવ્યો છે અને સાથે જ NEET પરીક્ષા વિરોધી આંદોલનો તેમજ NLC સંબંધિત પ્રદર્શનોમાં નોંધાયેલા કેસો પણ પાછા ખેંચવા વિનંતી કરી છે.