અમદાવાદ:દેશના ડ્રીમ પ્રોજેક્ટ ગણાતા અમદાવાદ-મુંબઈ બુલેટ ટ્રેન કોરિડોરના નિર્માણમાં નેશનલ હાઈ સ્પીડ રેલ કોર્પોરેશન લિમિટેડ (NHSRCL) દ્વારા અદભુત ઈજનેરી કૌશલ્યનું પ્રદર્શન કરીને વધુ એક મહત્વપૂર્ણ સફળતા મેળવવામાં આવી છે. અમદાવાદ શહેરની મધ્યમાંથી પસાર થતી સાબરમતી નદી ઉપર ૪૮૦ મીટર લાંબો વિશાળ હાઈ-સ્પીડ રેલવે બ્રિજ સફળતાપૂર્વક તૈયાર કરી દેવામાં આવ્યો છે.

​આ અદ્યતન ફ્લાયઓવર બ્રિજ જમીનથી આશરે ૩૬ મીટર એટલે કે ૧૨ માળની ઊંચી ઈમારત જેટલી ઊંચાઈ પર સ્થાપિત કરવામાં આવ્યો છે. આ માર્ગમાં હયાત રેલવે લાઈનો, ઓવરબ્રિજ અને અન્ય શહેરી ઈન્ફ્રાસ્ટ્રક્ચર આવતા હોવાથી આ પુલના પિલર્સ સામાન્ય કરતાં વધુ ઊંચા રાખવાની જરૂરિયાત ઊભી થઈ હતી. સ્થાનિક અંતરની દ્રષ્ટિએ આ બ્રિજ સાબરમતી બુલેટ ટ્રેન સ્ટેશનથી આશરે ૧ કિલોમીટર અને અમદાવાદ બુલેટ ટ્રેન સ્ટેશનથી લગભગ ૪ કિલોમીટરના અંતરે સ્થિત છે.

​સાબરમતી નદીના કુદરતી પ્રવાહ તેમજ પર્યાવરણને નુકસાન ન પહોંચે તે માટે સમગ્ર સુપરસ્ટ્રક્ચર માત્ર ૮ ગોળાકાર પિલર્સ (Piers) પર ઊભું કરવામાં આવ્યું છે. જેમાં ૪ પિલર્સ નદીના પટમાં, ૨ પિલર્સ નદીના કિનારે અને બાકીના ૨ પિલર્સ કિનારાની બહારના ભાગે નિર્માણ પામ્યા છે. જળપ્રવાહમાં કામચલાઉ માળખાં ઊભા કર્યા વગર ગર્ડર જોડવા માટે 'બેલેન્સ્ડ કેન્ટિલેવર મેથડ' જેવી અદ્યતન ટેકનોલોજીનો ઉપયોગ કરાયો છે, જેના લીધે ૭૬ મીટરના ૫ મુખ્ય સ્પાન અને ૫૦ મીટરના ૨ સ્પાન સાથે ઓછા પિલર્સમાં આ અસાધારણ નિર્માણ શક્ય બન્યું છે.

​નોંધનીય છે કે, હાઈ-સ્પીડ રેલ પ્રોજેક્ટ અંતર્ગત ગુજરાત રાજ્યમાંથી પસાર થતી કુલ ૨૧ નદીઓ પૈકી આ બ્રિજ પૂર્ણ થતાં જ ૧૮ નદીઓ પરના પુલનું નિર્માણ સફળતાપૂર્વક આટોપી લેવાયું છે. અદ્યતન સુરક્ષા અને ટેકનોલોજીથી સુસજ્જ આ બ્રિજ ભારતના હાઈ-સ્પીડ ટ્રાન્સપોર્ટેશન ઈન્ફ્રાસ્ટ્રક્ચર ક્ષેત્રે એક નવો ઈતિહાસ રચી રહ્યો છે.