કેન્દ્રપાડા: ઓડિશાના કેન્દ્રપાડા જિલ્લામાં રાષ્ટ્રીય ધોરીમાર્ગ ૫૩ પર પારાદીપ અને ચાંડીખોલ વચ્ચે માર્શાઘાઈમાં નીલાચલ માર્કેટ પાસે ચાલી રહેલા બાંધકામ વચ્ચે સતત ભારે વરસાદને કારણે હાઇવેનો નવો બનેલો એક વિશાળ ભાગ અચાનક ધસી પડતા ત્રણ ટ્રકો પલટીને ખાડામાં પડી ગઈ હતી અને ગંભીર અકસ્માત સર્જાયો હતો.

પ્રાપ્ત વિગતો અનુસાર, આ ઘટના બની ત્યારે હાઇવે પર નિર્માણ કાર્ય ચાલુ હતું અને ભારે વરસાદના લીધે થોડી જ સેકન્ડોમાં રસ્તાનો મોટો ભાગ નીચે બેસી ગયો હતો, જેના કારણે ત્યાંથી પસાર થતી માલવાહક ટ્રકો કાબૂ ગુમાવી બેસી હતી અને રસ્તાની બાજુમાં ખાડામાં ખાબકતા મોટો ખતરો પેદા થયો હતો.

આ અકસ્માતના પગલે હાઇવેના નબળા બાંધકામ અને ગુણવત્તા સામે ગંભીર સવાલો ઊભા થયા છે, કારણ કે નવા બનેલા રસ્તા પર જ આ પ્રકારનું ગાબડું પડવાથી વાહનવ્યવહાર સંપૂર્ણપણે ખોરવાઈ ગયો હતો અને સ્થાનિક તંત્રમાં દોડધામ મચી ગઈ હતી.

ઘટનાની જાણ થતા જ વહીવટી તંત્ર અને સંબંધિત અધિકારીઓ તાત્કાલિક સ્થળ પર પહોંચી ગયા હતા અને ક્ષતિગ્રસ્ત માર્ગને સુરક્ષિત કરીને ટ્રાફિક પૂર્વવત કરવા માટે યુદ્ધના ધોરણે કામગીરી શરૂ કરી દીધી છે. આગામી સમયમાં આ માર્ગના બાંધકામની ગુણવત્તાની ઉચ્ચ સ્તરીય તપાસ કરવામાં આવશે અને સુરક્ષાના ભાગરૂપે તાકીદના ધોરણે મરામતની કાર્યવાહી હાથ ધરાશે.