ફ્રાન્સમાં હંતાવાયરસનો સૌપ્રથમ સત્તાવાર કેસ નોંધાયો છે, જેનાથી યુરોપિયન આરોગ્ય તંત્રમાં ચિંતાનું મોજું ફરી વળ્યું છે. ફ્રાન્સના આરોગ્ય મંત્રી દ્વારા આપવામાં આવેલી માહિતી અનુસાર, આ વાયરસનો શિકાર બનેલી મહિલા મુસાફર તાજેતરમાં એમવી હોન્ડિયસ ક્રુઝ શિપ પરથી પરત ફરી હતી. સ્પેનના કેનેરી ટાપુઓથી પેરિસ લાવવામાં આવતી વખતે આ મહિલામાં વાયરસના લક્ષણો જોવા મળ્યા હતા અને પરીક્ષણ બાદ રિપોર્ટ પોઝિટિવ આવ્યો હતો. તેમની સાથે પ્રવાસ કરી રહેલા અન્ય ચાર ફ્રેન્ચ નાગરિકોના રિપોર્ટ નેગેટિવ આવ્યા હોવા છતાં, સાવચેતીના ભાગરૂપે તેઓને આગામી પંદર દિવસ માટે આઇસોલેશનમાં રાખવામાં આવ્યા છે. આરોગ્ય અધિકારીઓ ક્રુઝ શિપના અન્ય મુસાફરોની પણ સઘન તપાસ કરી રહ્યા છે.