વાશિંગ્ટન : અવકાશ વિજ્ઞાન ક્ષેત્રે રસ ધરાવતા યુવાનો અને મહત્વાકાંક્ષી ઉમેદવારો માટે એક અત્યંત રોમાંચક અને સોનેરી તક સામે આવી છે. અમેરિકી અંતરિક્ષ એજન્સી નાસા (NASA) દ્વારા અવકાશયાત્રીઓની નવી પેઢી તૈયાર કરવા માટે સત્તાવાર રીતે ભરતી પ્રક્રિયા શરૂ કરવામાં આવી છે અને લાયક ઉમેદવારો પાસેથી અરજીઓ આમંત્રિત કરવામાં આવી છે.
નાસાના આ નવા અભિયાન હેઠળ પસંદ કરાયેલા ઉમેદવારો ભવિષ્યમાં ચંદ્ર પર માનવીય વસાહત ઊભી કરવા, આર્ટેમિસ કાર્યક્રમના મહત્વપૂર્ણ મિશન પાર પાડવા તેમજ ચંદ્ર પર પ્રસ્તાવિત 'મૂન બેઝ' (Moon Base) તૈયાર કરવામાં સક્રિય ભૂમિકા ભજવશે. આ ભરતી ખાસ કરીને આગામી સમયમાં મંગળ ગ્રહ પર માનવીય મિશન મોકલવાની તૈયારીઓનો પણ એક મહત્ત્વપૂર્ણ ભાગ છે.
ઉપલબ્ધ વિગતો અનુસાર, આ ભરતી પ્રક્રિયા અંતર્ગત અરજી કરવાની અંતિમ તારીખ ૪ ડિસેમ્બર નક્કી કરવામાં આવી છે, જ્યારે નાસા દ્વારા વર્ષ ૨૦૨૭ ના અંત સુધીમાં અંતિમ પસંદગી પામેલા ઉમેદવારોના નામની જાહેરાત કરવામાં આવશે. આ અવકાશયાત્રીઓ એવા મુશ્કેલ અને દીર્ઘકાલીન મિશનો માટે વિશેષ તાલીમ મેળવશે જે અવકાશ સંશોધનના ઇતિહાસમાં સીમાચિહ્નરૂપ સાબિત થશે.
ભૂતકાળમાં પણ નાસા દ્વારા ચંદ્ર અને મંગળ સંશોધન માટે અનેક મોટા પ્રોજેક્ટ્સ હાથ ધરવામાં આવ્યા છે, પરંતુ આ વખતે ચંદ્રના દક્ષિણ ધ્રુવ પર કાયમી મું બેઝ સ્થાપવાની યોજના પર વિશેષ ધ્યાન કેન્દ્રિત કરવામાં આવી રહ્યું છે જ્યાં પાણીની બરફની ઉપસ્થિતિ સંશોધનને નવી દિશા આપશે. હાલમાં જાહેર કરાયેલી આ ભરતી પ્રક્રિયાથી વૈશ્વિક સ્તરે યુવા વૈજ્ઞાનિકો અને સ્પેસ ઉત્સાહીઓમાં ભારે ઉત્સાહ જોવા મળી રહ્યો છે.