વોશિંગ્ટન : વિશ્વના સૌથી ધનીક ઉદ્યોગપતિ અને ટેસ્લા તથા સ્પેસએક્સના સ્થાપક ઈલોન મસ્ક ફરી એકવાર પોતાની અંગત જિંદગીને લઈને વૈશ્વિક મીડિયામાં ભારે ચર્ચાના કેન્દ્રસ્થાને આવ્યા છે. મસ્કની બ્રેન-ચિપ કંપની 'ન્યુરાલિંક'ના ઉચ્ચ અધિકારી અને ભારતીય મૂળના કેનેડિયન નાગરિક શિવોન ઝિલિસે ઈલોન મસ્ક સાથેના પોતાના પાંચ વર્ષ લાંબા પ્રેમના સંબંધોનો અંત આવ્યો હોવાની સત્તાવાર અને આઘાતજનક જાહેરાત કરી છે. સોશિયલ મીડિયા પ્લેટફોર્મ 'X' પર એક લાંબી અને ભાવુક પોસ્ટ લખીને ઝિલિસે ખુલાસો કર્યો છે કે ઈલોન મસ્કે કોઈ પણ પ્રકારની આગોતરી ચેતવણી કે ચર્ચા વિના માત્ર એક જ અઠવાડિયાની અંદર આ સંબંધનો અચાનક અંત આણી દીધો છે.

​ઝિલિસે પોતાની પોસ્ટમાં વિગતવાર જણાવતા લખ્યું હતું કે, "પ્રેમમાં હોવાથી લઈને માત્ર એક અઠવાડિયામાં કોઈ પૂર્વ ચેતવણી વગર બધું જ છોડી દેવું અત્યંત મુશ્કેલ અને પીડાદાયક છે. મારું હૃદય ખૂબ દુભાયું છે અને હું અત્યારે અત્યંત આઘાતમાંથી પસાર થઈ રહી છું." ઉલ્લેખનીય છે કે, શિવોન ઝિલિસ અને ઈલોન મસ્ક વચ્ચે માત્ર વ્યાવસાયિક જ નહીં પરંતુ અંગત રીતે અત્યંત ગાઢ સંબંધો હતા અને બંનેને આઈવીએફ (IVF) પ્રક્રિયા દ્વારા ચાર બાળકો છે. કુલ ૧૪ બાળકોના પિતા મસ્ક સાથેના આ અચાનક બ્રેકઅપથી ટેક જગત અને તેમના ચાહકોમાં મોટો આંચકો લાગ્યો છે.

​બ્રેકઅપ અગાઉના પર્સનલ મેસેજ જાહેર કર્યા:

​૨૪ સપ્ટેમ્બરની ચેટ: ઝિલિસે મસ્કને લખ્યું હતું - "તમને નાસ્તામાં મળીને ખૂબ આનંદ થયો, હું તમને ખૂબ પ્રેમ કરું છું." જેના જવાબમાં મસ્કે "હું પણ તને પ્રેમ કરું છું" લખીને હાર્ટ ઈમોજી મોકલ્યું હતું.
​૨૭ સપ્ટેમ્બરની રહસ્યમય પોસ્ટ: ચેટના માત્ર ત્રણ દિવસ બાદ ઝિલિસે અચાનક X પર લખ્યું હતું - "નવો દિવસ, નવી જિંદગી."
​ઓક્ટોબરમાં અંતિમ જાહેરાત: ત્યાર બાદ મસ્કે સોશિયલ મીડિયા પર ઝિલિસને અનફોલો કરી દીધા હતા અને સંબંધનો આત્યંતિક અંત આવ્યો હતો.
​પોતાના સંબંધોના અંત છતાં શિવોન ઝિલિસે ઈલોન મસ્ક પ્રત્યે કોઈ કડવાશ વ્યક્ત કરી નથી. તેમણે ઉમેર્યું હતું કે તે મસ્કની જિંદગીમાં એક શાંતિ, સલામતી અને માનસિક સ્થિરતા આપનારું સ્થળ બની શકી તેનો તેને સંતોષ છે. મુશ્કેલ સમયમાં મસ્કના ચહેરા પર મુસ્કાન પાછી લાવવાનો આનંદ તેમણે અનુભવ્યો હતો. તેમણે આશા વ્યક્ત કરી હતી કે ભવિષ્યમાં બાળકોના શ્રેષ્ઠ ઉછેર માટે બંને સારા મિત્રો અને જવાબદાર માતા-પિતા (કો-પેરેન્ટ્સ) તરીકે સાથે મળીને કામ કરતા રહેશે.

​બીજી તરફ, આ સમગ્ર મામલે ઈલોન મસ્ક અથવા તેમના પ્રતિનિધિઓ દ્વારા હજુ સુધી કોઈ સત્તાવાર નિવેદન કે ટિપ્પણી કરવામાં આવી નથી. ટેકનિકલ ક્ષેત્રે અબજો ડોલરના સામ્રાજ્યનું સંચાલન કરતા મસ્કના અંગત સંબંધોમાં આવી રહેલા સતત ઉતાર-ચઢાવ હવે વૈશ્વિક સ્તરે અખબારોની મુખ્ય હેડલાઇન્સ બની રહ્યા છે.