દમિશ્ક, : મધ્ય સીરિયાના પલમીરા અને અલ-સુખના શહેર વચ્ચે આવેલા દમિશ્ક-દીર-એજ-જોર ધોરીમાર્ગ પર શનિવારે બે પેસેન્જર બસો વચ્ચે સર્જાયેલી અત્યંત ભીષણ અને સામસામેની ટક્કરમાં ઓછામાં ઓછા ૩૫ લોકોનાં મોત નીપજ્યાં છે અને અંદાજે ૩૦થી વધુ લોકો ગંભીર રીતે ઘાયલ થયા છે.

સરકારી મીડિયાના અહેવાલો અને આરોગ્ય મંત્રાલયના જણાવ્યા અનુસાર, આ અકસ્માત એટલો ભયાનક હતો કે ટક્કર બાદ તરત જ બંને બસોમાં ભયંકર આગ ફાટી નીકળી હતી, જેના કારણે ઘટનાસ્થળે ભારે નાસભાગ અને અફરાતફરી મચી ગઈ હતી.

અકસ્માતનું સ્થળ નજીકની હોસ્પિટલથી ખૂબ જ દૂર હોવાના કારણે તાત્કાલિક રાહત અને બચાવ કામગીરી હાથ ધરવા માટે સીરિયન સંરક્ષણ મંત્રાલય દ્વારા મિલિટરી હેલિકોપ્ટરોની મદદ લેવામાં આવી હતી અને ઈજાગ્રસ્તોને હોમ્સ મિલિટરી હોસ્પિટલમાં દાખલ કરવામાં આવ્યા હતા.

કતાર સ્થિત મીડિયા પ્લેટફોર્મના જણાવ્યા મુજબ, આ ૪૦૦ કિમી લાંબો મહત્વનો હાઇવે દેશના પૂર્વીય હિસ્સાને રાજધાની સાથે જોડે છે, જ્યાં રણના વિસ્તારમાં પેસેન્જર બસ અને ગૃહ મંત્રાલયની બસ વચ્ચે આ અકસ્માત સર્જાયો હતો.

ઘટનાની ગંભીરતાને ધ્યાનમાં રાખીને સુરક્ષાદળો અને રાહતટીમો દ્વારા તાત્કાલિક ધોરણે બચાવ કામગીરી પૂર્ણ કરવામાં આવી હતી અને મુસાફરોને સુરક્ષિત બહાર કાઢવાના પ્રયાસો હાથ ધરવામાં આવ્યા હતા.

આ ગમખ્વાર દુર્ઘટના પાછળના ચોક્કસ કારણો હજુ સુધી જાણી શકાયા નથી, પરંતુ પ્રશાસન અને સંબંધિત વિભાગો દ્વારા આ મામલે ઊંડાણપૂર્વક તપાસ શરૂ કરીને ભવિષ્યમાં આવી ઘટનાઓ રોકવા માટે જરૂરી પગલાં લેવાની દિશામાં કાર્યવાહી આદરવામાં આવી છે