ન્યૂ યોર્ક : ન્યુ યોર્ક યુનિવર્સિટી (NYU) માં જ્યારે વિદ્યાર્થીઓ અને તેમના પરિવારો સ્નાતક પદવીના ઉત્સાહમાં ડૂબેલા હતા, ત્યારે એક અત્યંત નિચલી કક્ષાની ઘટનાએ સમગ્ર કેમ્પસને હચમચાવી દીધું છે. બુધવારે સાંજે જ્યારે ‘ગ્રેડ એલી’ બ્લોક પાર્ટી ચાલી રહી હતી, ત્યારે અચાનક યુનિવર્સિટીની સ્ટેઈનહાર્ટ સ્કૂલ બિલ્ડિંગની ટોચ પર નાઝી પ્રતીક ‘સ્વસ્તિક’ ધરાવતો ધ્વજ ફરકતો જોવા મળ્યો હતો.
 
યહૂદી દાતાના સન્માનમાં બનેલી બિલ્ડિંગને નિશાન બનાવાઈ
આ ઘટના વધુ ગંભીર એટલા માટે છે કારણ કે જે બિલ્ડિંગ પર આ ધ્વજ ફરકાવવામાં આવ્યો હતો, તેનું નામ જાણીતા યહૂદી અબજોપતિ અને પરોપકારી માઈકલ સ્ટેઈનહાર્ટના નામ પરથી રાખવામાં આવ્યું છે. આ ધ્વજ પર માત્ર સ્વસ્તિક જ નહીં, પરંતુ ‘NYU’ અને ‘સ્ટાર ઓફ ડેવિડ’ (યહૂદી પ્રતીક) પણ ચીતરેલા હતા. માઈકલ સ્ટેઈનહાર્ટ ઇઝરાયેલમાં યહૂદી યુવાનો માટેના ‘બર્થરાઇટ’ પ્રોગ્રામના સ્થાપક છે અને તેમણે યહૂદી શિક્ષણ માટે કરોડો ડોલરનું દાન આપ્યું છે.
 
યુનિવર્સિટી અને વિદ્યાર્થીઓમાં ભારે રોષ
NYU ના પ્રવક્તા વિલી નોર્વેલે આ ઘટનાની સખત નિંદા કરતા જણાવ્યું કે, "અમે આઘાત અને ઊંડા દુઃખમાં છીએ. આ નફરતનું પ્રતીક છે અને અમારા કેમ્પસમાં દ્વેષ અને વિભાજન માટે કોઈ સ્થાન નથી." જોકે ધ્વજ દેખાયાના ૧૫ મિનિટમાં જ સુરક્ષાકર્મીઓએ તેને ઉતારી લીધો હતો, પરંતુ ત્યાં હાજર સ્નાતક વિદ્યાર્થીઓ માટે આ પળ અત્યંત દુઃખદાયક બની રહી હતી. અનેક વિદ્યાર્થીઓએ આ કૃત્યને ‘ઘૃણાસ્પદ’ ગણાવ્યું હતું.
 
કોણ છે જવાબદાર? તપાસ શરૂ
NYU ની કેમ્પસ સેફ્ટી ટીમ અત્યારે ન્યૂ યોર્ક પોલીસ (NYPD) સાથે મળીને સીસીટીવી ફૂટેજ તપાસી રહી છે. આ ઘટના એવા સમયે બની છે જ્યારે યુનિવર્સિટીમાં વક્તા તરીકે જોનાથન હૈડ્ટની પસંદગીને લઈને વિદ્યાર્થીઓમાં પહેલેથી જ રોષ જોવા મળી રહ્યો હતો. હવે આ નવો વિવાદ યુનિવર્સિટીના વહીવટીતંત્ર માટે માથાનો દુખાવો બની ગયો છે.
 
માઈકલ સ્ટેઈનહાર્ટ સાથે જોડાયેલા વિવાદો
ઉલ્લેખનીય છે કે માઈકલ સ્ટેઈનહાર્ટ પોતે પણ વિવાદોથી ઘેરાયેલા રહ્યા છે. ૨૦૨૨ માં તેમણે પ્રાચીન વસ્તુઓના કૌભાંડને કારણે ટ્રસ્ટી બોર્ડમાંથી રાજીનામું આપ્યું હતું. તેમ છતાં, ગ્રેજ્યુએશન જેવા પવિત્ર અવસરે યહૂદી વિરોધી પ્રતીકોનો ઉપયોગ કરીને જે રીતે નફરત ફેલાવવાનો પ્રયાસ થયો છે, તેની સમગ્ર અમેરિકામાં ટીકા થઈ રહી છે. યાન્કી સ્ટેડિયમમાં યોજાનારા મુખ્ય સમારોહ પહેલા બનેલી આ ઘટનાએ સુરક્ષા વ્યવસ્થા સામે પણ સવાલો ઉભા કર્યા છે.