મુંબઈ : વડા પ્રધાન નરેન્દ્ર મોદીના મુંબઈ આગમન પહેલાં સુરક્ષા એજન્સીઓને હચમચાવી નાખતી એક ચોંકાવનારી ઘટના સામે આવી છે. બાંદ્રા-કુર્લા કોમ્પ્લેક્સ (BKC) ના એક લક્ઝરી શોપિંગ મોલમાં પીએમઓ (Prime Minister's Office) નું નકલી ડિજિટલ ઓળખપત્ર બનાવીને ઘૂસણખોરી કરનાર એક ગુજરાતી યુવકની મુંબઈ પોલીસે ધરપકડ કરી લીધી છે. ખાર વિસ્તારના રહેવાસી રોહન પ્રેમલ પરીખ નામના ૨૪ વર્ષીય યુવકે પૂછપરછ દરમિયાન અજીબોગરીબ દાવો કરતા કહ્યું હતું કે તે માત્ર પોતાના પરિવાર પર પ્રભાવ પાડવા અને પોતે કોઈ મોટી સરકારી નોકરીમાં છે તેવું બતાવવા માંગતો હતો.

શું હતી સમગ્ર ઘટના અને હથિયારો સાથે પકડાયાનું રહસ્ય?

મળતી માહિતી મુજબ, વડા પ્રધાનના કાર્યક્રમની પૂર્વસંધ્યાએ ૭ સપ્ટેમ્બરના રોજ રોહન પરીખ પોતાના સાથી દિલીપ કુંડે (૪૯) અને પ્રથમેશ બાગુલ સાથે જિયો વર્લ્ડ પ્લાઝા મોલની અંદર જવા માગતો હતો. જોકે, દિલીપ કુંડે પાસે કારતૂસો ભરેલી રિવોલ્વર હોવાને કારણે મોલના સિક્યુરિટી સ્ટાફે તેમને અંદર જવાની ના પાડી દીધી હતી. આ બાબતે સિક્યુરિટી સાથે બોલાચાલી થતા રોહને પોતાની ઓળખ પીએમઓ અધિકારી તરીકે આપી હતી અને ડિજિટલ નકલી આઈ-કાર્ડ બતાવ્યું હતું, જેના આધારે તેઓ મોલમાં ઘૂસીને પરફ્યુમ અને વોલેટ ખરીદીને નીકળ્યા હતા. બાદમાં સુરક્ષા એજન્સીઓ સતર્ક થઈ ગઈ હતી અને બંનેની ધરપકડ કરી લેવામાં આવી હતી.

એઆઈ (AI) ની મદદથી બનાવ્યું હતું કાર્ડ અને પોલીસ તપાસ જારી

પોલીસની પ્રાથમિક તપાસમાં ખુલાસો થયો છે કે રોહને પીએમઓનું આ નકલી ડિજિટલ આઈ-કાર્ડ બનાવવા માટે આર્ટિફિશિયલ ઇન્ટેલિજન્સ (AI) ટૂલ્સનો ઉપયોગ કર્યો હતો. પોલીસ સમક્ષ પૂછપરછમાં આરોપીએ એવો પણ દાવો કર્યો હતો કે તેને ૨૦૨૪માં પીએમઓ તરફથી ભૂમિકા અંગેનો કોઈ સમર્થન ઇમેઇલ મળ્યો હતો. જોકે, પોલીસ તેના આ દાવાઓને નકારી રહી છે અને આ ગંભીર મામલે ટેક્નિકલ વિગતો તથા અન્ય સાથીદારોની ભૂમિકા અંગે ઊંડાણપૂર્વક તપાસ હાથ ધરી રહી છે. વીઆઈપી સુરક્ષા વચ્ચે પીએમઓ જેવી સંવેદનશીલ સંસ્થાના નામે નકલી કાર્ડ બનાવી ફરવું એ ભારે ચિંતાનો વિષય બન્યો છે.