​વોશિંગ્ટન:અમેરિકામાં યોજાનારી આગામી મહત્વપૂર્ણ મધ્યસત્ર (મિડટર્મ) ચૂંટણીઓ પહેલાં રાષ્ટ્રપતિ ડોનાલ્ડ ટ્રમ્પના વહીવટીતંત્રને કાયદાકીય મોરચે મોટો આંચકો લાગ્યો છે. યુનાઇટેડ સ્ટેટ્સ ટપાલ સેવા (USPS) દ્વારા મેઈલ-ઈન વોટિંગ એટલે કે ટપાલ દ્વારા મતદાન કરવાની પ્રક્રિયા પર નવા કડક નિયમો અને નિયંત્રણો લાદવાના પ્રયાસો પર ફેડરલ જજ ઈન્દિરા તાલવાનીએ પોતાનો સ્ટે આદેશ લંબાવી દીધો છે. આ ચુકાદાને પગલે ટ્રમ્પ તંત્ર ચૂંટણી પહેલાં ટપાલ મતદાન પર નવા નિયમો લાગુ કરી શકશે નહીં.

​આ ચુકાદો એવા સમયે આવ્યો છે જ્યારે દેશના વિવિધ રાજ્યોમાં મધ્યસત્ર ચૂંટણી માટે ટપાલ દ્વારા મતદાન બેલટ મોકલવાની પ્રક્રિયા શરૂ થઈ ચૂકી છે. આ અગાઉ માર્ચ મહિનામાં રાષ્ટ્રપતિ ટ્રમ્પે એક ખાસ કારોબારી આદેશ પર હસ્તાક્ષર કર્યા હતા, જે અંતર્ગત ટપાલ વિભાગને મતદારોની યાદી ચકાસવા અને બેલટ કવર પર ખાસ બારકોડ સિસ્ટમ ફરજિયાત કરવાની સત્તા આપવામાં આવી હતી. ડેમોક્રેટિક શાસિત રાજ્યો અને નાગરિક અધિકાર સંગઠનોએ આ નિયમોને પડકારતાં કોર્ટના દરવાજા ખટખટાવ્યા હતા અને દાવો કર્યો હતો કે આ ફેરફારોથી લાખો મતદારો પોતાના મતાધિકારથી વંચિત રહી જશે.

​કોર્ટના આ નિર્ણય સામે ટ્રમ્પ વહીવટીતંત્રે આકરો વિરોધ દર્શાવ્યો છે. વ્હાઇટ હાઉસ અને જસ્ટિસ ડિપાર્ટમેન્ટે આ આદેશ સામે તુરંત અપીલ કરવાની જાહેરાત કરી છે અને મામલામાં તાત્કાલિક હસ્તક્ષેપ કરવા માટે યુએસ સુપ્રીમ કોર્ટના દરવાજા ખટખટાવ્યા છે. સંરક્ષણ અને ટપાલ વિભાગના તર્કોને ફગાવતાં જજ ઈન્દિરા તાલવાનીએ સ્પષ્ટ કર્યું હતું કે ચૂંટણી આટલી નજીક હોવાથી આ પ્રકારના વ્યાપક ફેરફારોથી સમગ્ર ચૂંટણી પ્રક્રિયામાં અરાજકતા ફેલાઈ શકે છે. આ કાયદાકીય જંગ હવે સુપ્રીમ કોર્ટમાં પહોંચતા અમેરિકી રાજકારણમાં ગરમાવો આવી ગયો છે.