મ્યાનમારમાં શુક્રવારે રાત્રે સ્થાનિક સમય અનુસાર 10:36 વાગ્યે 5.2 ની તીવ્રતાનો ભૂકંપ અનુભવાયો હતો. આ આંચકા અનુભવાતાં જ લોકો ભયભીત થઈને પોતાના ઘરોની બહાર દોડી આવ્યા હતા. જોકે, રાહતની વાત એ છે કે અત્યાર સુધી આ ઘટનામાં કોઈના પણ ઘાયલ થવાના કે જાનહાનિના સમાચાર મળ્યા નથી.

મ્યાનમાર કુદરતી આપત્તિઓ, ખાસ કરીને ભૂકંપ અને સુનામીની દ્રષ્ટિએ અત્યંત સંવેદનશીલ ક્ષેત્ર માનવામાં આવે છે. આ દેશ ભારતીય, યુરેશિયન, સુંડા અને બર્મા પ્લેટ્સના મિલનબિંદુ પર સ્થિત છે. આ ટેક્ટોનિક પ્લેટો વચ્ચેના સતત ઘર્ષણ અને વિશાળ સમુદ્ર કિનારાના કારણે અહીં ભૂકંપનું જોખમ હંમેશા ઊંચું રહે છે.

દેશમાં 'સાગાઇંગ ફોલ્ટ' નામની 1,400 કિલોમીટર લાંબી મુખ્ય ફોલ્ટ લાઇન આવેલી છે, જે ભૂકંપનું મુખ્ય સ્ત્રોત ગણાય છે. આ ફોલ્ટ લાઇન સાગાઇંગ, માંડલે, બાગો અને યાંગૂન જેવા વિસ્તારો માટે જોખમ વધારે છે, જ્યાં દેશની આશરે 46 ટકા વસ્તી વસવાટ કરે છે.