​ચેન્નઈ: ભારતીય સિનેમાના ઈતિહાસમાં પોતાના અનોખા પ્રયોગો, નવતર વિચારસરણી અને દિશાચિંધક સર્જન માટે અમર સ્થાન ધરાવતા પ્રખ્યાત ફિલ્મ નિર્દેશક, લેખક અને કથાકાર સંગીતમ શ્રીનિવાસ રાવનું શનિવારે રાત્રે ચેન્નઈની કાવેરી હોસ્પિટલ ખાતે ઉંમર સંબંધિત બીમારીઓને કારણે ૯૪ વર્ષની વયે નિધન થયું છે. છેલ્લા કેટલાક સમયથી વયસહજ સ્વાસ્થ્ય સમસ્યાઓથી પીડાતા આ મહાન સર્જકના અવસાનના સમાચાર પ્રસરતા જ સમગ્ર દક્ષિણ ભારતીય ફિલ્મ ઉદ્યોગ તેમજ ભારતીય સિનેજગતમાં ભારે શોકનું મોજું ફરી વળ્યું છે.

​આંધ્રપ્રદેશના ગુડૂરમાં ૨૧ સપ્ટેમ્બર ૧૯૩૧ના રોજ જન્મેલા સંગીતમ શ્રીનિવાસ રાવે પોતાની કારકિર્દીની શરૂઆત પ્રખ્યાત નિર્દેશક એલ. વી. પ્રસાદના સહાયક તરીકે કરી હતી. ૧૯૭૨માં તેલુગુ ફિલ્મ 'નીતિ નિજાયતી'થી દિગ્દર્શન ક્ષેત્રે પ્રવેશ કરનારા શ્રીનિવાસ રાવે છ દાયકાથી પણ વધુ સમયની પોતાની દીર્ઘ કારકિર્દીમાં તેલુગુ, તમિલ, કન્નડ, હિન્દી અને મલયાલમ એમ પાંચ ભાષાઓમાં અનન્ય યોગદાન આપ્યું હતું. તેમણે એક પણ સંવાદ વગરની અને કમલ હાસન અભિનીત સુપરહિત સાયલન્ટ કોમેડી 'પુષ્પક વિમાન' બનાવીને સમગ્ર વિશ્વમાં ભારતીય સિનેમાનો ડંકો વગાડ્યો હતો. આ ઉપરાંત, ટાઈમ ટ્રાવેલ પર આધારિત દક્ષિણ ભારતની પ્રથમ સાયન્સ ફિક્શન ફિલ્મ 'આદિત્ય ૩૬૯', દિવ્યાંગ નૃત્યાંગના સુધા ચંદ્રનના જીવન પર આધારિત 'મયૂરી', તેમજ 'ભૈરવ દ્વીપમ' જેવી સાહસિક અને પૌરાણિક ફિલ્મો બનાવીને તેમણે પોતાની અદ્ભુત પ્રતિભા સાબિત કરી હતી.

​પોતાના જીવનના અંતિમ તબક્કામાં પણ તેઓ સક્રિય રહ્યા હતા અને ૯૪ વર્ષની વયે પણ નાગ અશ્વિન દ્વારા નિર્મિત 'સિંગ ગીતમ' નામની મ્યુઝિકલ ફેન્ટસી ફિલ્મનું કામ પૂર્ણ કરીને વિશ્વના સૌથી વયોવૃદ્ધ સક્રિય નિર્દેશકોમાંથી એક બનવાનું ગૌરવ પ્રાપ્ત કર્યું હતું.

​તેમના દુઃખદ અવસાન પર તમિલનાડુના સુપ્રસિદ્ધ કવિ અને ગીતકાર વાઇરામુથુએ અત્યંત ગહન શોક વ્યક્ત કરતા જણાવ્યું હતું કે, સંગીતમ શ્રીનિવાસ રાવ માત્ર એક નિર્દેશક નહોતા પરંતુ નવી પેઢી માટે એક જીવંત યુનિવર્સિટી સમાન હતા. તેમની વિદાયથી ભારતીય સિનેમાએ એક મહાન પ્રયોગશીલ દ્રષ્ટા ગુમાવ્યા છે. આ ઉપરાંત, જુનિયર એનટીઆર, નાંદામુરી બાલકૃષ્ણા સહિત અનેક નામી કલાકારો, દિગ્દર્શકો અને રાજકીય અગ્રણીઓએ પણ સોશિયલ મીડિયાના માધ્યમથી પોતાના સંવેદનશીલ સંદેશાઓ પાઠવીને આ મહાન આત્માને અશ્રુભરી શ્રદ્ધાંજલિ અર્પણ કરી છે.