નવી દિલ્હી :કેન્દ્ર સરકારના લાખો કર્મચારીઓ અને પેન્શનધારકો માટે 8મા પગાર પંચને લઈને અત્યંત મહત્વના સમાચાર સામે આવ્યા છે. નવી દિલ્હીમાં યોજાયેલી બેઠકોનો પ્રથમ તબક્કો સફળતાપૂર્વક પૂર્ણ થયા બાદ, હવે કમિશન દેશના વિવિધ શહેરોમાં પ્રવાસ કરી કર્મચારી સંગઠનો સાથે સીધી ચર્ચા કરશે. આ પ્રક્રિયાનો મુખ્ય હેતુ કર્મચારીઓના પગાર માળખા, પેન્શન સુધારા અને અન્ય ભથ્થાઓ અંગે પાયાના સ્તરની અપેક્ષાઓ સમજવાનો છે. મે અને જૂન મહિનામાં નિર્ધારિત કરવામાં આવેલી વિવિધ બેઠકો બાદ કમિશન પોતાની ભલામણોને આખરી ઓપ આપશે, જેની સીધી અસર લાખો પરિવારોના આર્થિક ભવિષ્ય પર પડવાની છે.

શેડ્યૂલ મુજબ, બેઠકોનો આગામી રાઉન્ડ 4 અને 5 મેના રોજ પુણેથી શરૂ થશે, ત્યારબાદ 18-19 મેના રોજ હૈદરાબાદમાં ચર્ચાઓ યોજાશે. જૂન મહિનાની શરૂઆતમાં કમિશનની ટીમ શ્રીનગરની મુલાકાત લેશે અને 8 જૂને લદ્દાખમાં આ પ્રવાસનો અંતિમ તબક્કો પૂર્ણ થશે. સૌથી મહત્વની બાબત એ છે કે કર્મચારીઓ અને પેન્શનર જૂથો પાસે પોતાના સૂચનો અને માંગણીઓ રજૂ કરવા માટે 31 મે સુધીનો સમય છે. અગાઉ આ સમયમર્યાદા ઓછી હતી, પરંતુ કર્મચારી સંગઠનોની રજૂઆત બાદ તેને લંબાવવામાં આવી છે, જેથી વધુમાં વધુ લોકો પોતાનો અવાજ કમિશન સુધી પહોંચાડી શકે.

સૂચનો સબમિટ કરવા માટે સરકારે કડક નિયમો પણ જાહેર કર્યા છે. કર્મચારીઓએ મેમોરેન્ડમના રૂપમાં માત્ર ઓનલાઈન પોર્ટલ દ્વારા જ પોતાના વિચારો રજૂ કરવાના રહેશે. ઈમેલ કે પોસ્ટ દ્વારા મોકલેલી કોઈ પણ રજૂઆત ગ્રાહ્ય રાખવામાં આવશે નહીં. આ બેઠકોમાં મોંઘવારી ભથ્થામાં ફેરફાર, આરોગ્ય લાભો અને સેવા શરતોમાં સુધારા જેવા મુદ્દાઓ કેન્દ્રસ્થાને રહેશે. કમિશન દ્વારા તૈયાર કરવામાં આવનાર આ અહેવાલ આગામી સમયમાં કેન્દ્રીય કર્મચારીઓના જીવનધોરણ અને આર્થિક પાસાઓમાં મોટો બદલાવ લાવશે તેવી પ્રબળ શક્યતા સેવાઈ રહી છે.