એકતા નગર :ભારતીય સિનેમાના શ્રેષ્ઠ પ્રદાનની ઉજવણી કરવા માટે મંચ તૈયાર થઈ ગયો છે. ૨૨ સપ્ટેમ્બર ૨૦૨૬ના રોજ ગુજરાતના એકતા નગર, કેવડિયા ખાતે યોજાનારા ૭૨મા રાષ્ટ્રીય ફિલ્મ પુરસ્કારો માટેની તૈયારીઓ પૂરજોશમાં આખરી ઓપ લઈ રહી છે. ભારતના રાષ્ટ્રપતિ વર્ષ ૨૦૨૪ માટે ભારતીય સિનેમામાં ઉત્કૃષ્ટ સિદ્ધિઓને બિરદાવતા આ પ્રતિષ્ઠિત પુરસ્કારો એનાયત કરશે. ૧૯૫૪માં સ્થાપિત આ પુરસ્કારો વિવિધ ભાષાઓ, પ્રદેશો અને ફિલ્મ નિર્માણના ક્ષેત્રમાં ઉત્કૃષ્ટતાને માન્યતા આપે છે.

અનંત નાગને દાદાસાહેબ ફાળકે પુરસ્કાર:
પીઢ અભિનેતા અનંત નાગને ભારતીય સિનેમામાં પાંચ દાયકાથી વધુ સમયના ઉત્કૃષ્ટ યોગદાન બદલ વર્ષ ૨૦૨૪નો પ્રતિષ્ઠિત દાદાસાહેબ ફાળકે એવોર્ડ એનાયત કરવામાં આવશે. ભારતના રાષ્ટ્રપતિ ૨૨ સપ્ટેમ્બરના રોજ આયોજિત સમારોહમાં તેમને આ સન્માન આપશે. અનંત નાગે કન્નડ અને ભારતીય સિનેમામાં અદ્ભુત કલાત્મક યોગદાન આપ્યું છે.

મુખ્ય પુરસ્કારો અને વિજેતાઓ:
આ વખતની એવોર્ડ શ્રેણીમાં ‘આર્ટિકલ ૩૭૦’ ને શ્રેષ્ઠ ફીચર ફિલ્મ, ‘ભંગાર’ ને શ્રેષ્ઠ નોન-ફીચર ફિલ્મ અને ‘રામ-નામી’ ને શ્રેષ્ઠ ડોક્યુમેન્ટરી તરીકે પસંદ કરવામાં આવી છે. અભિનય ક્ષેત્રે ‘બ્રહ્મયુગમ’ માટે મમ્મૂટી અને ‘ચંદુ ચેમ્પિયન’ માટે કાર્તિક આર્યનને સંયુક્ત રીતે શ્રેષ્ઠ મુખ્ય અભિનેતા જાહેર કરાયા છે, જ્યારે ‘આર્ટિકલ ૩૭૦’ માટે યામી ગૌતમને શ્રેષ્ઠ મુખ્ય અભિનેત્રીનો પુરસ્કાર અપાશે. આ ઉપરાંત, ‘સ્વાતંત્ર્ય વીર સાવરકર’ ફિલ્મ માટે રણદીપ હુડાની શ્રેષ્ઠ ડેબ્યૂ દિગ્દર્શક તરીકે પસંદગી થઈ છે. ‘કલ્કિ ૨૮૯૮ AD’, ‘અમરન’, ‘પુષ્પા: ધ રૂલ પાર્ટ-૦૨’, ‘ભૂલ ભુલૈયા ૩’ અને ‘સ્ત્રી ૨’ જેવી ફિલ્મો પણ વિવિધ શ્રેણીઓમાં માન્યતા પ્રાપ્ત કરશે.

દિલ્હીથી એકતા નગર: રાષ્ટ્રીય પુરસ્કારોની નવી સફર:
૭૨મા રાષ્ટ્રીય ફિલ્મ પુરસ્કારો સાથે એક નવા અધ્યાયની શરૂઆત થઈ રહી છે. અત્યાર સુધી રાષ્ટ્રીય રાજધાની દિલ્હીમાં જ યોજાતા આ સમારોહને પ્રથમવાર બહાર ગુજરાતના એકતા નગર ખાતે લવાયો છે. માહિતી અને પ્રસારણ મંત્રાલયે આગામી વર્ષોમાં આ સન્માન સમારોહ દેશના વિવિધ ભાગોમાં યોજવાનો નિર્ણય લીધો છે, જેથી દેશની સાંસ્કૃતિક અને સિનેમેટિક વિવિધતાને વધુ નજીકથી પ્રદર્શિત કરી શકાય. ૨૨ સપ્ટેમ્બરના દિવ્ય સમારોહમાં દેશભરના દિગ્ગજ ફિલ્મ નિર્માતાઓ, કલાકારો અને ટેકનિશિયનો એકતા નગર ખાતે એકત્રિત થશે.